26 vjet më parë, Beteja e Koshares shënoi një moment të lavdishëm në historinë e Ushtrisë Çlirimtare të Kosovës (UÇK). Ajo betejë e cila i dha fund ndarjes mes Kosovës dhe Shqipërisë, ishte një akt i pastër besimi dhe sakrifice për liri, që vazhdon të frymëzojë breza të tërë.
Presidentja e Kosovës, Vjosa Osmani shprehu mirënjohje për gjithë ata që dhanë jetën në këtë luftë. Ajo theksoi se Beteja e Koshares është një flakadan që nuk shuhet kurrë.
“Aty ku regjimi gjenocidal i Serbisë kishte ngritur murin ndarës me Shqipërinë, vajza e djem të UÇK-së ngritën një ideal e mbollën guxim e frymëzim për breza të tërë. Aty ku dukej e pamundura, ata sollën fitoren”, ka shkruar Osmani.
Presidentja ka shtuar se Kosharja ishte një akt i pastër besimi se për liri, populli i Kosovës është i gatshëm të paguaj çdo çmim.
E kryeministri në detyrë i Kosovës, Albin Kurti, mëngjesin e sotëm, bëri homazhe në Kompleksin Memorial “Dëshmorët e Koshares”.
Ai kujtoi betejën e lavdishme të Koshares dhe shprehu mirënjohje për sakrificën e luftëtarëve të UÇK-së.
“26 vjet më parë, me betejën e lavdishme të Koshares, Ushtria Çlirimtare e Kosovës, me luftëtarë nga pothuajse të gjitha njësitet e zonave operative të saj, shembi kufirin që ndante shqiptarët, kufirin që ndante Kosovën nga Shqipëria e që ishte i vjetër që nga viti 1913, respektivisht nga vitit 1918”, tha Kurti.
Në këtë betejë të rëndësishme, ranë dëshmorë 114 luftëtarë të UÇK-së, përfshirë komandantin Agim Ramadani, i njohur si “Katana”, dhe Sali Çekun.
Pjesë e kësaj lufte ishin gjithashtu vullnetarë nga shtete të ndryshme si Franca, Algjeria, Italia, Suedia dhe Britania, ndërsa ushtria serbe ishte mbështetur nga mercenarë rusë.
Për të kujtuar sakrificat e atyre që dhanë jetën për lirinë e Kosovës, Kurti tha: “Ne vijmë këtu te varret e dëshmorëve që t’ia kujtojmë e përkujtojmë vetës se sa e lartë ishte sakrifica e tyre, sa e lavdishme është lufta e UÇK-së dhe sa i madh çmimi i lirisë që e gëzojmë, të shtetit të cilin po e ndërtojmë së bashku.” /Telegrafi/
