Nënkryetarja e LDK-së Vjosa Osmani, ka thënë se ka vullnet për marrëveshje me VV-në.
Sipas saj, tani pas dekretimit të Albin Kurti këto dy javë duhet të shfrytëzohen për marrëveshje e jo për t’ia lënë fajin njëra-tjetrës, raporton EO.
“Qëndrimi i LDK-së është thënë qartë gjatë ditëve që shkuan është konfirmuar dhe nga ne që jemi pjesë e organeve të LDK-së dhe nga vet kryetari që LDK-ja ka vullnet që të arrihet një marrëveshje me Vetëvendosjen. Tanimë që zyrtarisht e kemi mandatimin e kandidatit për kryeministër dhe koha është e përcaktuar me Kushtetutë të vendit, ajo për të cilën bëj thirrje unë, është që dy javët e ardhshme të shfrytëzohen maksimalisht për arritjen e marrëveshjes e jo për fajësime ndaj njëra-tjetrës”, ka thënë ajo në një deklaratë për mediat para selisë qendrore të LDK-së.
“Besoj e kemi shumë të qartë se cili ka qenë vullneti i qytetarëve i 6 tetorit dhe të gjitha mospajtimet që na kanë ndarë duhet të lihen anash dhe tjetër në vijim duhet të shfrytëzohen maksimalisht dhe me respekt të ndërsjellët për të arritur një marrëveshje me të cilën të dyja partitë ndihen se janë të përfaqësuara, në përputhje me votat e qytetarëve që i kemi marr me 6 tetor”, ka shtuar Osmani.
“Marrëveshja mund të arrihet vetëm nëse ka vullnet të qartë nga të dyja pakët dhe vetëm nëse ka gatishmëri për të arritur tek një mes, në një kompromis, në të cilin të dyja partitë shihen që vullnetshëm po hynë në koalicion, duhet të investohet në ditët në vijim të rikthehet besimi e të ulemi në tavolinë me respekt të ndërsjellë dhe duke pasur parasysh fuqinë politike që e përfaqëson njëra dhe tjetra, duke pasur parasysh votat që i kemi marr më 6 tetor. Unë besoj që ky vullnet ekziston dhe tani ka ardhur koha që ky vullnet të materializohet, dhe nuk ka pse shtyhet, ne kemi hyrë për ta çuar PAN-in në opozitë dhe duhet ta lëmë në opozitë aty ku është”.
Osmani ka thënë se veprimet e Kurtit me postimin e video-mesazheve nuk janë qasje e mirë për arritje të marrëveshjes për bashkëqeverisje.
“Unë nuk besoj që kjo qasje i ndihmon arritjes së marrëveshjes palët duhet të ulen me synimin për të gjetur një mes, një kompromis në atë se dy palët e kuptojnë se janë duke ndërtuar të ardhmen e Kosovës”, ka deklaruar Osmani.
Osmani ka thënë se nuk e di se cili do të ishte vendimi final se a do ta votojnë një Qeveri të pakicës nga ana e VV-së apo jo. Ajo ka shtuar se nuk është e vërtetë që në takime është diskutuar për ndarje të bordeve.
Kreu i VV-së, Albin Kurti, sërish i është drejtuar kryetarit të LDK-së, Isa Mustafa me një video-mesazh pasi, duke kërkuar nga ky i fundit që të ulen sërish për të finalizuar marrëveshjen për bashkëqeverisje. Kurse president, Hashim Thaçi ka bërë të ditur se Dekretin Presidencial me emrin e kandidatit për Kryeministër e ka dërguar në Kuvendin e Republikës së Kosovës.
