Presidentja e Kosovës, Vjosa Osmani është takuar të hënën me ambasadorin e Bashkimit Evropian në Kosovë, Aivo Orav. Në takim është biseduar për zgjedhjet në Kosovë, e po ashtu për një sërë vizitash që pritet t’i kenë zyrtarë të lartë të BE-së gjatë javëve e muajve në vijim në Kosovë.
Në takim Osmani po ashtu ka kërkuar sërish heqjen e masave të BE-së ndaj Kosovës dhe ato ka thënë se po i dëmtojnë qytetarët e Kosovës.
“Në takim u diskutua gjithashtu për një sërë vizitash të zyrtarëve të lartë të Bashkimit Evropian, të cilët pritet ta vizitojnë Kosovën në javët dhe muajt në vijim. Këto vizita do të jenë një mundësi e mirë për forcimin e mëtejshëm të bashkëpunimit në mes të Kosovës dhe BE-së, veçanërisht në fushat kyçe të zhvillimit dhe integrimit evropian. Presidentja Osmani theksoi rëndësinë e angazhimit të përbashkët për të çuar përpara prioritetet strategjike të vendit, me fokus të veçantë në forcimin e institucioneve demokratike dhe përshpejtimin e rrugëtimit evropian të Kosovës. Me këtë rast, Presidentja Osmani ripotencoi edhe njëherë rëndësinë e largimit të masave të padrejta, të cilat përfundimisht po i dëmtojnë qytetarët e Kosovës”, thuhet në njoftimin e Presidencës.
