Në përfundim të vizitës së saj në Shqipëri, presidentja e Republikës së Kosovës, Vjosa Osmani ka vizituar Durrësin. Porti i Durrësit dhe Zyra doganore e Kosovës në këtë porti ka qenë në interes të Presidentes Osmani.
Një vizitë për t’u njohur me Portin më të rëndësishëm të Shqipërisë dhe punën që bëhet në këtë sektor, sakaq edhe për Zyrën Doganore të Kosovës në këtë port, kanë qenë pjesë e interesit të kreut të shtetit të Kosovës, në përfundim të vizitës së saj në Shqipëri.
Presidentja Osmani u takua, në bashkinë e Durrësit, me kryetaren Emiriana Sako si dhe drejtues te pushtetit vendor.
Kryetarja Sako e njohu presidenten Osmani me zhvillimet më të fundit të qytetit si dhe projektet më të rëndësishme që po vihen në zbatim.
Më pas presidentja Vjosa Osmani kreu një vizitë në Portin e Durrësit, ku u prit nga drejtori i përgjithshëm i Autoritetit Portual Pirro Vëngu.
Ky i fundit e njohu presidenten Osmani me veprimtarinë ekonomike të portit më të madh të vendit, treguesit e arritur si dhe fluksin që ka përjetuar gjatë kësaj vere.
Më pas presidentja e Kosovës ka vizituar Zyrën Doganore të Kosovës, që gjendet në portin e Durrësit, ku u njoh nga stafi i saj me punën që kryhet aty. Zyra Doganore e Kosovës në portin e Durrësit mbulon zhdoganimin e mallrave që kanë destinacion Kosovën.
Ka nisur veprimtarinë e saj prej datës 1 tetor 2022, duke i mundësuar ekonomisë së Kosovës që praktikisht të ketë qasje në det, duke lehtësuar kështu depërtimin e bizneseve vendore në tregjet ndërkombëtare.
Janë rreth 1040 kompani të Kosovës, të cilat përdorin portin e Durrësit dhe këto kapacitete çdo vit për të zhdoganuar mallrat e tyre, si një nga lehtësirat për të cilat dy qeveritë kanë rënë dakord mes njëra-tjetrës, gjë që ka sjellë ka një lehtësi shumë më të madhe, duke shkurtuar kohën dhe kostot e zhdoganimit.
