Nën intonimin e himnit shtetëror është mbajtur ceremonia e certifikimit të 344 rekrutëve të Forcës së Sigurisë së Kosovës, gjenerata 01/2025.
Presidentja e vendit, Vjosa Osmani gjatë fjalës së saj tha se ushtria nuk është thjesht një forcë e armatosur, por një betim i përhershëm për atdheun.
“Sot është një ditë e veçantë për ju dhe për Kosovën ku 344 djem e vajza i bashkohen FSK-së. Të dashur ushtarë ju keni kaluar plotë sfida me përkushtim. FSK është më shumë se një forcë, është simbol i përkushtimit dhe sakrificës dhe dëshmi e forcës së shtetit tonë”, ka thënë Osmani.
Ajo po ashtu tha se FSK po marshon përpara dhe e mirë pajisur.
“Me punën dhe përkushtimin tuaj do të vazhdoni ta mbani shtetin tonë…FSK po marshon fuqishëm përpara e mirë pajisur. Ju jeni pasardhës të drejtë të UÇK-së, të cilët sakrifikuan gjithçka për atdheun në momentet historike të vendit tonë. Të kujtojmë dëshmorët, heronjtë dhe martirët… edhe sot shpreh falënderimin dhe të aleatëve tanë, përfshirë SHBA-të”, ka thënë ndër të tjera Osmani.
Ndryshe, kjo është gjenerata e parë e stërvitjes ushtarake, e cila filloi më 25 janar 2025 dhe përfundon sot më 28.03.2025.
