Situata në Kosovë, sidomos në veri të saj, vijon të jetë jo vetëm në qendër të shqetësimeve të kancelarive perëndimore, por edhe të politikës kosovare. Zërave të reagimeve shqetësuese të krerëve të partive opozitare në Kosovë, i është bashkuar edhe kryetari i AKR-së, Behgjet Pacolli.
Ai, nëpërmjet një letre të hapur drejtuar kryeministrit Albin Kurti, të publikuar edhe në faqen e tij në Facebook, shpreh shqetësim jo vetëm për mungesën e bashkëpunimit të brendshëm mes forcave politike dhe qeverisë, por edhe për mungesën e bashkëpunimit të Kurtit me komunitetin ndërkombëtar.
Sipas tij, “populizmi i sotëm në Kosovë po mposht arsyen”.
“Kosova u ndërtua me mund dhe sakrifica duke ndërthurur vullnetin kombëtar dhe mbështetjen ndërkombëtare nga aleatët dhe partnerët tanë amerikanë dhe evropianë. Në këtë kuptim, besoj se politika juaj është e gabuar dhe që çon në izolimin më të madh dhe mungesën më të theksuar të mbështetjes ndërkombëtare që nga fillimi i rezistencës paqësore të udhëhequr nga presidenti Rugova në fund të viteve ’80 dhe suprimimi e autonomisë së Kosovës dhe vendosja e sundimit të aparteidit në Beograd.”- shkruan Pacolli.
Sipas tij, Kosova në 24 vitet e fundit ka përjetuar zhvillimin më të madh ekonomik, social dhe politik në tërë historinë e saj, por Kurti vendosi të hedhë poshtë çdo arritje të dy dekadave të pasluftës dhe mbi të gjitha që e merr si të mirëqenë pavarësinë e Kosovës.
“Ndërtuat barriera ndaj bashkëpunit dhe etiketuat kriminel dhe të korruptuar të gjithë ata pa asnjë fakt që dhanë kontribut në rrugën e Kosovës drejt lirisë, pavarësisë dhe shtetndërtimit. Ju hodhët poshtë çdo thirrje dhe vullnet për të bashkëpunuar mbi këtë etiketim që ngjan me gjyqet popullore në rrugë që nuk kanë vend në demokracinë tonë. Këtë refuzim të bashkëpunimit e kam parë si deputet, por mbi të gjitha si qytetar i Kosovës, ku trajtimi juaj ndaj opozitës dhe kujtdo që nuk pajtohet me bindjet tuaja politike është refuzuar dhe injoruar, shpesh është përqeshur dhe sulmuar. Nuk pres që ju të reflektoni dhe të merrni kahjen e bashkëpunimit dhe të racionalitetit politik në interes të të gjithë qytetarëve të Republikës sonë, por më vjen keq që kemi ardhur si një shtet i ri dhe një shoqëri në këtë gjendje ku polarizimi ka arritur në shkallën shqetësuese që është e dhimbshme që nuk mund të bëjmë më shumë bashkë si shtet për interesat jetike të Kosovës.”- thekson Pacolli.
Kreu i AKA-së akuzon Kurtin se është kryeministri i vetëm në historinë e pas-pavarësisë që nuk ka arritur asnjë njohje të vetme të Ksovës në arenën ndërkombëtare.
“Veprimet tuaja të pakoordinuara me aleatët, term me të cilin e keni bërë shaka dhe keni sulmuar çdo kohë, po e dëmtojnë Kosovën. Kosova ka funksionuar mbi këtë parim të shenjtë të kordinimit me aleatët që është shtylla e pavarësisë dhe lirisë sonë. Moskoordinimi me SHBA-në dhe partnerët evropianë është ahistorik për Kosovën, është e kundërta e asaj që është ndërtuar për mbi 3 dekada luftë për liri dhe pavarësi. Sot, ju si kryeministër i shtetit më të ri në Evropë, veprimet tuaja ahistorike po e dëmtojnë Kosovën në perspektivë afatgjatë.”- thekson Pacolli.
Ky i fundit e fton Kurtin që të largohet nga grupet anti-perëndimore dhe anti-historike që e shohin Kosovën si një eksperiment politik.
