Presidenti Ilir Meta ka dalë nga dera e prokurorisë së Tiranës, e cila e thërriti kreun e shtetit për ta marrë në pyetje në lidhje me padinë e bërë nga Meta në adresë të kreut të Këshillit të Emërimeve në Drejtësi, Ardian Dvorani.
Meta deklaroi se shkeljet ligjore të kryera nga kreu i KED-së Dvorani janë ‘tmerrësisht flagrante’ dhe se si personalisht shpreson që prokuroria të mos ndodhet nën presione politike. Presidenti shtoi nga ana tjetër është i qetë dhe se do të bashkëpunojë ngushtë me organin e akuzës.
Meta: Në respekt të pritjes suaj, s’mund të largohesha pa respektuar vëmendjen dhe durimin tuaj, pavarësisht se për momentin ka çështje të tjera më të rëndësishme.
Me pak fjalë jam këtu në përgjigje të ftesës së prokurorisë pas kallëzimit penal që unë kam bërë për shtetasin Ardian Dvorani, për dy vepra të qarta penale të përmbushura me qëllim prej tij.
Besoj se kemi dhënë sqarime të mëtejshme dhe plotësuese në vijim të të gjithë provave dhe dokumentave. Rasti është tmerrësisht flagrant dhe unë shpresoj që prokuroria të mos jetë nën presione politike dhe të bëjë punën e saj me profesionalizëm dhe durim. Mendoj se kjo është një provë e madhe për të gjtihë ardhmen e reformës në drejtësi.
Të gjitha provat e depozituara deri tani janë të mjaftueshme që prokuroria të veprojë. Kjo është një çështje të cilës askush s’mund t’i shmanget përsa i takon shterimit të saj të plotë. Ne jemi të qetë dhe të duruar dhe do të bashkëpunojmë me prokurorinë, pasi ky është një rast tejet flagrant.
