Kamerat e sigurisë nga një burg i shtetit të Xheorxhias në SHBA kanë regjistruar momentin dramatik kur 5 efektivë të zyrës lokale të Sherifit rrahin një të burgosur.
Pamjet u publikuan nga avokati i të burgosurit, 41-vjeçarit Jarret Hobbs, i cili njoftoi se autoritetet kishin nisur hetimet për rastin.
Sherifi Jim Proctor tha se kishte parë videon bashkë me pjesëtarë të ekipit të tij dhe kishte urdhëruar një hetim të brendshëm.
Por avokati i të burgosurit të rrahur, Harry Daniels, kërkon procedim penal dhe ndalim të efektivëve. “Ky është një sulm brutal”, tha ai për gazetarët.
Video e publikuar nga avokati mbrojtës, dhe e analizuar nga CNN, nuk ka audio. Gjithashtu autoritetet nuk kanë pranuar të komentojnë për atë që ka ndodhur para ngjarjeve që shihen në video.
Daniels tha për CNN se ekziston edhe një video tjetër që përmban edhe audio të ngjarjes së rëndë, por ajo nuk është publikuar ende.
