Parku Kombëtar Lurë-Mali i Dejës është një nga bukuritë natyrore më të rralla që ka Shqipëria.
Në qendër të parkut ndodhet mali i Dejës, që ngrihet drejt qiellit duke u përshëndetur me Korabin, Malin e Munellës dhe perëndimin deri në det.
Në verilindje ndodhet Lura, në lindje mali i Runjës, ndërsa në perëndim nja horizont i pamasë sa hija e Dejës laget në ujërat e Adriatikut.
Administrata Rajonale e Zonave të Mbrojtura, Dibër postoi foto nga Parku Kombëtar Lurë-Mali i Dejës, me panorama mahnitëse.
Parku Kombëtar “Lurë-Mali i Dejës” është ndër parqet me sipërfaqen më të madhe, por edhe ndër më të bukurit në Shqipëri.
Male të harlisura me pyje, pisha, bredhi, ahu, bimësi e pafundme, rrethojnë liqenet akullnajore në shpate dhe që njihen nga të gjithë si “12 liqenet e Lurës”.
Ngado që ta nisësh rrugën, në tre destinacione duke u ngjitur për në Lurë, bukuritë shtohen, pamjet bëhen më piktoreske dhe madhështia të mbush gjatë rrugëtimit, aq sa para malesh dukesh çdo çast e më i vogël sepse malet ngjiten lart drejt qiellit.
Parku Kombëtar nis nga Uraka, Zall-Gjocaj-Lurë, ndërsa në krahun lindor, Macukull, Kepi i Skënderbeut, Mas Deja.
Janë tre rrugë që të çojnë në Lurë: njëra nis nga Rruga e Kombit, Rrëshen-Zallë-Gjoçaj-Lurë, tjetra nis nga Rruga e Kombit, Mat, Kemi i Skënderbeut, Fushë-Pela që është edhe kontakti i parë me liqenin e luleve, ndërsa e treta nis nga Dibër-Lurë që është një nga urët lidhëse më të bukura ku malet shohin njëri-tjetrin, Deja dhe Korabi. /ATSH/
