Palestinezët po largohen nnë numër të madh nga qytetet prej tendash në Rafah, pasi po shtohet rreziku i një sulmi të mundshëm të madh izraelit në qytetin jugor të Gazës. Kjo duket në pamjet e reja satelitore nga Planet Labs.
CNN ka identifikuar disa kampe që strehojnë popullsinë e madhe të refugjatëve të Gazës – përfshirë kampin kryesor në Rafah qendror që strehonte mijëra tenda – të cilat janë zvogëluar ndjeshëm në madhësi mes të martës dhe të mërkurës.
Edhe pse disa kampe në Rafah panë një rënie të popullsisë në fillim të javës, shumica e kampeve të identifikuara nga CNN panë rënien e tyre më të madhe që nga e marta.
Disa nga kampet e tendave kishin qenë në shkollat e Kombeve të Bashkuara, të tjerët në fusha të hapura ose përgjatë rrugëve për muaj të tërë. Tani, një numër i konsiderueshëm janë zhdukur, por shumë mbeten në kampe pavarësisht urdhrave nga Forcat e Mbrojtjes të Izraelit (IDF) për t’u larguar.
Të paktën 110,000 palestinezë janë larguar nga Rafah që nga e hëna, pasi IDF lëshoi një urdhër evakuimi, sipas agjencisë së OKB-së për refugjatët palestinezë (UNRWA).
Rrjedhat e palestinezëve morën rrugën për në Al-Mawasi në fillim të kësaj jave, pas një urdhri izraelit për zhvendosje. Kreu i Këshillit Norvegjez të Refugjatëve (NRC), Jan Egeland, paralajmëroi se kushtet e rënda atje, duke përfshirë mungesën e sigurisë së qëndrueshme, akomodimit ose hapësirës adekuate, “kualifikojnë direktivat e zhvendosjes së Izraelit si transferim të dhunshëm, që përbën një shkelje serioze të ligjit ndërkombëtar. ”
Rafah është bërë fokusi qendror i luftës së Izraelit në Gaza, ndërsa kryeministri izraelit Benjamin Netanyahu përballet me presionin në rritje nga krahu ekstrem i koalicionit të tij për të nisur një operacion tokësor në shkallë të plotë në qytet për të shkatërruar Hamasin, ndërsa krahu më i moderuar ka kërkuar atij t’i jepte përparësi sigurimit të një marrëveshjeje armëpushimi për pengjet.
Izraeli nisi një sulm ushtarak në Gaza më 7 tetor pasi grupi militant Hamas, i cili qeveris Gazën, vrau të paktën 1200 njerëz në Izrael dhe rrëmbeu më shumë se 250 të tjerë.
