Ish- deputetja e PD-së Orjola Pampuri deklaroi sot se “përkeqësimi i situatës me fasoneritë është dështim i qeverisë, prandaj mbyllja e tyre është masa e duhur për ndalimin e përhapjes së virusit”.
Në një deklaratë për mediet, Pampuri tha se “të dhënat zyrtare konfirmojnë shqetësimin tonë se mbajtja hapur me kokëfortësi e fasonerive i ka kthyer ato në vatra të rrezikshme të përhapjes së infeksionit”.
“Në Krujë janë 18 persona të tjerë që kanë rezultuar pozitiv. Të gjithë punonjës fasonerie, kryesisht gra dhe vajza. Urojmë që të dhënat të pasqyrojnë realitetin dhe virusi të mos jetë përhapur akoma më shumë, por edhe kaq sa është, kemi një situatë shumë problematike. Brenda pak ditësh, një person i vetëm ka kontaminuar 86 të tjerë, duke na faktuar 3 gjëra të rëndësishme: Se virusi ka aftësinë të përhapet me shpejtësi. Se fasoneritë, si vend me përqëndrim të lartë, janë vendi ideal për përhapjen e virusit. Se qeveria është përgjegjësja kryesore për situatën e krijuar”, tha ajo.
Ajo tha se qeveria duhet të kishte mbyllur fasoneritë që në momentin e parë të shpërthimit të epidemisë.
