Ulqini mirëpriti të enjten (17 gusht) në mbrëmje Panairin e 22-të të Librit.
Pjesë e tij janë 40 shtëpi botuese nga trevat shqiptare dhe disa prej shteteve të rajonit.
Dhjetëra pushues ndaluan në disa nga stendat e panairit.
Organizatorja Irena Toçi tregon rreth detajeve të këtij edicioni si dhe rëndësinë që ka ai.
“Panairi ka krijuar prej disa vitesh tanimë edhe një traditë shumë të mirë të dhënies së çmimeve, duke vlerësuar autorin më të mirë, studiuesin më të mirë, librin më të mirë të vitit për fëmijë, por edhe romanin më të mirë për vitin, gjithmonë për ata autorë dhe botues që marrin pjesë në panair,” rrëfen znj. Toçi.
Në ceremoninë e çeljes morën pjesë edhe Ministri i të Drejtave të Njeriut dhe Pakicave Fatmir Gjeka si dhe Kryetari i Komunës së Ulqinit Omer Bajraktari.
“Ky panair, i cili vijon prej 20 vitesh me radhë, do të ketë edhe një jetë më të gjatë. Pikërisht për këtë, Ministria dhe qeveria janë prezente si bashkorganizatore për të përkrahur Panairin e Librit, i cili promovon edhe vlerat e pakicës shqiptare këtu,” thotë ministri Gjeka.
Kultura dhe Ulqini është një simbiozë shumë e rëndësishme, sidomos për ne që jemi si popull pakicë shqiptar në Mal të Zi. Kjo na mban me një frymë të rëndësishme për zhvillimin tonë, zhvillimin e kulturës sonë dhe jam më se i bindur se kjo do të vazhdojë në vitet e ardhshme,” shprehet Bajraktari, kryetari i komunës së Ulqinit.
Nata e parë e panairit të 22-të të librit në Ulqin tërhoqi vëmendjen e shumë lexuesve ndërsa ai do të vijojë edhe tre netë të tjera deri më 20 gusht.
