Neuropsikiatri, Sami Rexhepi, thotë se pas kalimit të pandemisë COVID-19, do t’i vijë radha shëndetit mendor e që sipas tij do të ketë fluks të madh të pacientëve në Qendrën e Shëndetit Mendor.
Ai thotë se pacientët po riacarohen, e ata të cilët e kanë kaluar koronavirusin po kërkojnë ndihmë sepse janë të traumatizuar.
“Institucionet tona ende nuk e kanë kuptuar me seriozitet të plotë çështjen e shëndetit mendor dhe COVID-19. Prej rasteve të cilat i kam, njerëzit të cilët e kanë kaluar sëmundjen janë shumë të traumatizuar. Po flasim për një traumë akute sepse ende është pandemia, ende është sëmundja duke u zhvilluar, ende rreziku është shumë i madh për ata të cilët nuk kanë qenë të infektuar. Sa i përket pacientëve të qendrës ne merremi me rastet e të sëmurëve kronikë psikiatrikë por e vërej që kohën e fundit kanë nisë me u riacaruar pacientët”, thotë ai, raporton KP.
Drejtori Qendrës së Shëndetit Mendor në Prishtinë, thotë se frika është ajo që po i përcjellë më së shumti pacientët, e që ka bërë që kjo Qendër të pranojë numër më të madh të tyre,
“Në përgjithësi numri i klientëve tanë, acarimi është në rritje e sipër, edhe klientët e tjerë të cilët nuk janë të sëmurë kronikë psikiatrikë që marrin shërbime në qendër, edhe pse jemi shumë të kufizuar për t’iu ofruar shërbime, po tregojnë shenja të një ankthi të shtuar shumë, mirëpo problemi më i madh është frika. Frika është tek të dy palët, edhe tek ata që e kanë kaluar sëmundjen, posaçërisht nëse e kanë pasur një simptomatologji më të vështirë, nëse kanë pas problem me frymëmarrje ose kanë qenë në oksigjenoterapi është një frikë shumë e madhe. Edhe pjesa tjetër të cilët ende nuk e kanë kaluar është sikurse ankth i pritjes, sikurse je duke pritur kur po të vjen radha ty”, thotë ai.
Sipas Rexhepit, trauma nga koronavirusi do të shihet pas tejkalimit të pandemisë. Atëherë, thotë ai, do të ketë reagim më të fuqishëm nga njerëzit të cilët do të kenë post-trauma.
“Prej asaj qysh po e shoh sa është trauma akute, sepse ne jemi ende në periudhën e pandemisë, kjo është traumë akute nuk mundem me fol për një çrregullim pas stresit traumatik, se ato manifestime do të jenë shumë më shumë më vonë. Pastaj njerëzit do të kenë një reagim shumë të fuqishëm ndoshta edhe në ftohjet e thjeshta, për shkak se është një përvojë shumë e rëndë gjatë kalimit të kësaj periudhe, ajo mbetet, pastaj do të jetë sinonim dhe çdo ftohje të thjeshtë do ta marrim në mënyrë shumë më dramatike”, shpjegon Rexhepi.
Që nga muaji mars Qendra e Shëndetit Mendor në Prishtinë nuk ka mbajtur qëndrim ditor, duke dashur të parandalojë përhapjen e infeksionit, por nuk është mbyllur asnjëherë dhe ka vazhduar punën edhe me orar të zgjatur.
Në prill kjo qendër ka hapur thirrjet për qytetarë të cilët ndjejnë çrregullime dhe kanë nevojë për këshilla e trajtim, nismë kjo që është mbyllur në qershor pas lirimit të masave.
