Paneli Zgjedhor për Ankesa dhe Parashtresa ka pranuar ankesën e Listës Serbe dhe ka anuluar vendimin e Komisionit Qendror të Zgjedhjeve (KQZ), i cili më 21 gusht kishte refuzuar certifikimin e këtij subjekti politik për zgjedhjet lokale të 12 tetorit 2025.
Në vendimin e saj, PZAP ka urdhëruar KQZ-në që të regjistrojë Listën Serbe me listën e kandidatëve për asambletë komunale dhe për kryetarë komunash, duke theksuar se arsyetimi i KQZ-së nuk ishte i bazuar në mënyrë të plotë në ligj dhe nuk ishte dëshmuar bindshëm se kandidatët ishin në kundërshtim me kriteret ligjore për të drejtën për t’u zgjedhur.
“Aprovohet ankesa e subjektit politik Lista Serbe, me seli në Mitrovicën e Veriut, e paraqitur kundër vendimit të Komisionit Qendror të Zgjedhjeve (KQZ), për shkak të mos certifikimit të Listës së kandidatëve për Asamble Komunale dhe kandidatëve për Kryetar të Komunës të subjektit politik Lista Serbe, për pjesëmarrje në Zgjedhjet Lokale të Republikës së Kosovës që do të mbahen me datë 12 Tetor 2025.
Anulohet vendimi i Komisionit Qendror të Zgjedhjeve (KQZ) dhe urdhërohet KQZ që të certifikojë subjektin politik Lista Serbe me listën e kandidatëve për Asamble Komunale dhe kandidatëve për Kryetar të Komunës të këtij subjekti politik, sipas Rekomandimit të Zyrës për Regjistrim, Certifikimin dhe Kontrollin Financiar të subjekteve politike në KQZ-së datës 21.08.2025, për pjesëmarrje në Zgjedhjet Lokale të Republikës së Kosovës që do të mbahen me date 12 tetor 2025”, thuhet në vendimin e PZAP.
KQZ vendosi më 21 gusht mocertfikimin e Listës Serbe në zgjedhjet e 12 tetorit me argumentin se disa kandidatë nuk i përmbushnin kriteret ligjore për të qenë pjesë e garës zgjedhore. Anëtarët e Lëvizjes Vetëvendosje votuan kundër regjistrimit të kandidatëve të Listës Serbe, ndërsa anëtarët e opozitës abstenuan.
Ky veprim ishte kritikuar edhe nga BE, SHBA dhe OSBE, të cilat theksuan se përjashtimi i një subjekti politik cenon pluralizmin dhe gjithëpërfshirjen në procesin zgjedhor.
