Dje, dy partitë e mëdha, Partia Socialiste dhe Partia Demokratike, dorëzuan listat (e hapura dhe të mbyllura) në KQZ me emrat e kandidatëve për deputetë.
Ajo që bie në sy është se në këto lista nuk bën pjesë asnjë shqiptar nga komuniteti shqiptar në Britani. Duhet theksuar se Partia Demokratike asnjëherë nuk ka promovuar një figurë nga komuniteti shqiptar në Britani, ndërsa nga ana tjetër, Partia Socialiste, pasi mblodhi në një miting shqiptarët e Britanisë, shpalli konkurencën për kandidatët në platformën “Deputeti që Duam”.
Dr. Kristo Papa dhe Ervin Mulaj morën pjesë në këtë platformë, u angazhuan dhe u investuan duke kryer takime me komunitetin shqiptar në Britani.
Pyetja ishte: Cili nga ata dy do të merrte vendin e sigurtë në listat e Partisë Socialiste? Por askush nuk mendonte se asnjëri nuk do të bëhej pjesë e këtyre listave.
Me sa duket, kjo ishte një manovër e Kryeministrit Rama për të shtrirë edhe në Britani fasadën e platformës së tij “Deputeti që Duam”, pasi fundja, listat dalin nga zyra e tij, ashtu siç ka ndodhur gjithmonë.
Vlen të theksohet se këtë vit, në lista nuk është përfshirë as deputeti i Dibrës, Lavdrim Krashi, i cili katër vjet më parë u prezantua si një arritje e madhe për Partinë Socialiste, pasi kishte arritur të bindte një punonjës të Bashkisë së Londrës për të shkuar dhe shërbyer për popullin dibran.
“I fundit i Mohikanve”, i cili po kandidon në një listë partiake në Shqipëri, është avokati Naim Hasani, i cili është përfshirë në listat e Partisë Euroatlantike të drejtuar nga zoti Lulzim Basha.
Albuk TV, një kanal që mbështet komunitetin shqiptar në Britani, eshte ne krah të secilit nga ky komunitet që synon të bëhet pjesë e politikës në Shqipëri, pa dallime politike.
Një zë nga komuniteti shqiptar në Britani është i domosdoshëm në Parlamentin shqiptar, duke pasur parasysh të gjitha problematikat që ende ky komunitet përballet, probleme që shqiptarët e Italisë apo Gjermanisë i kanë tejkaluar dekada më parë.
