Bllokadat dhe protestat e studentëve në Serbi, të cilat shpërthyen pas tragjedisë në Novi Sad më 1 nëntor 2024, do të vijojnë sot me mitingun kryesor në qendër të Kragujevcit, shkruan A2 CNN.
Studentët e nisur nga qytete të ndryshme të Serbisë kanë arritur natën e kaluar në qendër të Kragujevcit, ku janë pritur nga një numër i madh i qytetarëve.
Sipas planit të publikuar nga studentët e Universitetit të Kragujevcit, të cilët i janë bashkëngjitur protestave, mitingu mbahet në Bulevardin Lepeniçki. Rregullat e protestës, të cilat studentët deklaruan në Instagram, janë që askush të mos shkaktojë incidente, do ndalohet përdorimi i mjeteve piroteknike dhe ndezja e zjarreve, si dhe do të lejohen për qarkullim vetëm shërbimet emergjente.
Shembja e çatisë së hekurudhës në Novi Sad la të vdekur 15 persona dhe disa të lënduar. Kjo bëri që studentët serbë të nisin protestat, të cilat u përhapën në të gjithë Serbinë si pjesë e një lëvizjeje që kërkon përgjegjësi dhe drejtësi.
