Parku natyror Kune-Vain-Tale këtë vit ka pasur numrin më të madh të turistëve.
Lajmi bëhet i ditur nga ministrja e Turizmit dhe Mjedisit Mirela Kumbaro e cila ishte këtë fundjavë në Kune Vain.
“Lajm i bukur që ky vit që po mbyllim ka pasur numrin më të lartë të turistëve në Parkun Natyror Kune-Vain-Tale! Kjo lagunë po ashtu është shpallur zonë e rëndësishme për shpendët në Europë dhe kushdo që e ka vizituar e kupton pse. Ata që ende s’kanë shkuar, ç’presin?”, u shpreh ajo.
Po ashtu, Kumbaro shtoi se 196 lloje shpendësh popullojnë zonën dhe ekspertët e AKZM Agjencia Kombëtare e Zonave të Mbrojtura që shkelin çdo ditë territorin pohojnë se ka një rikthim të shpendëve dhe shtim të numrit të tyre.
“Moratoriumi i gjuetisë ka shmangur në masë të madhe abuzimet që i bëheshin faunës, por ende vigjilenca dhe puna në terren s’duhet ngadalësuar për t’u siguruar gjallesave një jetesë të qetë në habitatet që u takojnë”, shprehet ajo.
Parku Natyror “Kune-Vain-Tale”, Lezhë është një nga perlat e lagunave të Shqipërisë dhe më gjerë, një madhështi natyrore.
Jo vetëm bukuritë natyrore, habitati i shpendëve dhe specieve ujore, por dhe flora është në një diversitet të pamasë.
Parku Natyror Kune-Vain-Tale është zona e parë e mbrojtur në Shqipëri. E shpallur në vitin 1940 si një rezervat gjuetie, ndër të tjera sot është një Zonë e Rëndësishme për Shpendët. Ekosistemi kompleks lagunor, i formuar nga dinamika e gjirit të Drinit, është një habitat i rëndësishëm për dimërimin e rosave dhe një zonë riprodhimi për shumë lloje peshqish me rëndësi tregtare./ATSH/
