Komisioneri Europian për Politikat e fqinjësisë e zgjerimit të Bashkimit Europian, Oliver Varhelyi, ndodhet sot në Romë për një vizitë zyrtare pune e me një mision e një axhendë të caktuar që ka në fokusin saj Ballkanin Perëndimor.
Shqipëria e vendet e Ballkanit Perëndimor do të jenë në qëndër të diskutimeve të Komisionit të Jashtëm të Parlamentit Italian ku do të marrë pjesë dhe kryekomisioneri europian.
Përballë deputetëve italianë, komisioneri Oliver Varhelyi do të ilustrojë udhëzimet e Bashkimit Europian për zgjerim në Ballkanin Perëndimor e për zhvillimin e politikave të fqinjësisë me vendet mesdhetare dhe me vendet e Europës Lindore. Seanca e Komisionit të Çështjeve të Jashtme të Parlamentit Italian do të zhvillohet me dyer të mbyllura.
Më pas Komisioneri Varhelyi së bashku me Ministrin italian të Çështjeve Europiane Enco Amendola e me Kryetarin e Komisionit Parlamentar të Çështjeve të Jashtme Piero Fassino do të marrin pjesë në konferencën “Bashkimi Europian- Ballkani, sfida e zgjerimit”.
“Me nisjne e negociatave për praninë e Shqipërisë dhe të Maqedonisë së Veriut në Bashkimin Europian, të cilat ndjekin negociatat e nisura me Serbinë e Malin e Zi, integrimi europian po përshpejtohet në një rajon që është kaq strategjik për stabilitetin e sigurinë e kontinentit europian e të pellgut mesdhetar. E aq më tepër është një zgjedhje strategjike për Italinë e cila ka konsoliduar marrëdhëniet politike, ekonomik e kulturore me vendet e Ballkanit e që është një fushë prioriteti në politikën e jashtme italiane”, ka deklaruar Kryetari i Komisonit të jashtëm parlamentar italian, Piero Fassino, në prag të kësaj dite pune të konferencës për vendet e Ballkanit Perëndimor.
