Partitë politike nuk kanë respektuar Ligjin për Barazi Gjinore për përfaqësim të barabartë 50 përqind me rastin e zgjedhjeve parlamentare të 6 tetorit. Të gjitha subjektet politike që garojnë në këto zgjedhje kanë përmbushur vetëm kuotën prej 30 përqind të përfaqësimit të grave në listat për kandidate për deputete, por jo duke respektuar Ligjin për Barazi Gjinore i cili kërkon përfaqësim 50 përqind për secilën gjini.
Për mos respektim të këtij ligji, ditë më parë Institucioni i Avokatit të Popullit e ka paditur Komisionin Qendror të Zgjedhjeve për mospërfaqësim të barabartë të grave në listat zgjedhore. Madje Avokati i Popullit i ka parashtruar Gjykatës Themelore në Prishtinë, padi me kërkesë për masë të përkohshme përkitazi me shkeljen nga ana e Komisionit Qendror të Zgjedhjeve të së drejtës për trajtim të barabartë të grave në të drejtat zgjedhore dhe të pjesëmarrjes.
Ligji për Barazi Gjinore, saktësisht neni 6 pika 8 saktëson se duhet të ketë një përfaqësim 50 përqind për secilën gjini.
“Përfaqësimi i barabartë gjinor në të gjitha organet legjislative, ekzekutive dhe gjyqësore dhe institucionet e tjera publike arrihet kur sigurohet përfaqësim minimal prej pesëdhjetë përqind (50%) për secilën gjini, përfshirë edhe organet e tyre drejtuese dhe vendimmarrëse”, thuhet në Ligjin për Barazi Gjinore.
Partitë politike nuk kanë respektuar këtë ligj dhe në listat e tyre nuk kanë më shumë se 34 gra të përfshira. Në listën e Lidhjes Demokratike të Kosovës, të cilës i prinë kandidatja për kryeministre Vjosa Osmani, janë vetëm 33 gra. Edhe Partia Demokratike e Kosovës në listën e saj për kandidatët për deputet ka vetëm 33 gra, e aq ka edhe koalicioni në mes Nismës-AKR-PD. Ndërkaq, Lëvizja Vetëvendosje dhe koalicioni AAK-PSD në listat e tyre kanë nga 34 gra.
Përfaqësim të barabartë në listat zgjedhore pati kërkuar edhe Agjencia për Barazi Gjinore e Republikës së Kosovës, ku përmes një komunikate për media u kishte bërë thirrje partive politike që të respektojnë Ligjin për Barazi Gjinore.
E pakënaqur me përfaqësimin e grave në listat për deputetwve, thotë të jetë drejtoresha ekzekutive e Qendrës Kosovare për Studime Gjinore, Luljeta Demolli, e cila thotë se partitë politike nuk kanë pasur vullnet për të respektuar Ligjin për Barazi Gjinore.
Një thirrje për përfaqësim të barabartë të grave në listat për deputet e kishte bërë edhe organizata Demokracia në Veprim. Blerta Aliu nga kjo organizatë thotë se pjesëmarrja e grave në listat e partive politike është vetëm 32 përqind.
Që të ketë një përfaqësim të barabartë të grave në listat për kandidatët për deputet, sipas analistit politik Rasim Alija duhet një demokratizim të vet subjekteve politike që ta kuptojnë se gratë duhet të përfaqësohen pasi edhe ato sjellin vota.
Por ka të atillë që mendojnë se kuotat duhet të largohen për përfaqësim të grave në listat zgjedhore. Analisti politik Rrahman Paçarizi për KosovaPress, thotë se është kundër këtyre kuotave, pasi sipas tij kuota gjinore është ofendim për vet gratë.
Përveç kritikave që të lartpërmendurit adresojnë ndaj partive politike për mos përfaqësim të grave në listat për kandidatët për deputet, ata vlerësojnë se edhe në tubimet elektorale që janë duke u mbajtur grave nuk po u jepet hapësira e duhur.
Drejtoresha e Qendrës Kosovare për Studime Gjinore, Luljeta Demolli, thotë se në këto zgjedhje po shihen të ndara gratë na burrat.
Edhe Blerta Aliu nga Demokracia në Veprim, thotë se do të ishte mirë që gratë të kenë më tepër hapësirë në tubime për të paraqitur programet e tyre.
Kurse, analisti politik Rrahman Pacarizi thotë se partitë politike bëjë shumë gabim që nuk i paraqesin programet e tyre përmes grave që kanë në listat e tyre, e që sipas tij të gjitha partitë politike kanë në përbërje gra shumë të zonjat.
Zgjedhjet parlamentare do të mbahen më 6 tetor.
