Danimarka hapi pas 30 vitesh ambasadën e saj në Irak të cilën e kishte mbyllur gjatë Luftës së Gjirit.
Ministri i Jashtëm i Danimarkës, Jeppe Kofod, i cili ndodhet për vizitë në Irak u takua në Bagdad me homologun e tij irakian, Fuad Hussein.
“Jemi të kënaqur për zhvillimin e marrëdhënieve mes Bagdadit dhe Kopenhagës. Danimarka po rihap ambasadën në Bagdad”, theksoi Kofod në një konferencë të përbashkët për media.
Ministri i Jashtëm irakian, Hussein tha se me Kofod kanë biseduar për zhvillimin e bujqësisë, industrisë dhe sektorit privat në Irak.
“Rihapja e ambasadës së Danimarkës është një hap i rëndësishëm në zhvillimin e marrëdhënieve dypalëshe. I bëjmë thirrje kompanive të Danimarkës që të investojnë në Irak”, deklaroi Hussein.
“Falënderojmë qeverinë e Danimarkës për mbështetjen që ka ofruar në rindërtimin e rajoneve të çliruara nga organizata terroriste e ISIS-it”, theksoi Hussein pasi vuri në dukje se Danimarka ka një rol të rëndësishëm në NATO.
Ministri i Jashtëm danez në kuadër të vizitës së tij në Bagdad pritet të takohet me presidentin irakian, Barham Salih dhe kryeministrin Mustafa Al-Kashimi.
Danimarka ka rreth 130 ushtarë në kuadër të forcave të koalicionit në bazën ushtarake Ayn Al Asad në perëndim të Irakut. Gjithashtu Danimarka udhëheq edhe forcat e koalicionit në Irak.
Ambasada e Danimarkës në Bagdad ishte mbyllur që nga Lufta e parë e Gjirit në vitin 1991.
