Pas aksidentit tragjik me tetë viktima në këlcyrë të Përmetit, Policia ka njoftuar se ka vënë në pranga një 24-vjeçar nga Shkodra pasi ka qenë duke transportuar tre emigrantë të paligjshëm, të cilët synonin të kalonin ilegalisht kufirin me Malin e Zi.
Kujtojmë se në orët e para të mëngjesit një makinë me emigrantë të paligjshëm ka dalë nga rruga në zonën e Këlcyrës teksa ndiqej nga policia. Aksidenti ka përfunduar me shtatë emigrantë dhe shoferin nga Shkodra të vdekur. Sipas njoftimit të policisë, 24-vjeçari është kapur në flagrancë teksa transportonte kundrejt pagesës, emigrantë nga India dhe Pakistani, që synonin të kalonin ilegalisht kufirin me Malin e Zi.
“Sekuestrohen automjeti tip “Benz” me të cilin transportoheshin emigrantët dhe celulari i të arrestuarit. Bazuar në informacionet e siguruara nga inteligjenca policore, për një rast të transportimit kundrejt pagesës, të disa emigrantëve që synojnë të kalojnë ilegalisht kufijtë, specialistët për Hetimin e Narkotikëve dhe Trafiqeve të Paligjshme, në bashkëpunim me shërbimet e Komisariatit të Policisë Kavajë, organizuan dhe finalizuan operacionin policor të koduar “Illegal”.
Gjatë operacionit u vu në pranga shtetasi E. B., 24 vjeç, banues në Shkodër. Në zonën e quajtur “Bishti i Zhurit”, Rrogozhinë, 24-vjeçari u kap në flagrancë duke transportuar me një automjet tip “Benz”, 3 emigrantë nga India dhe Pakistani, të cilët synonin të kalonin ilegalisht kufirin me Malin e Zi.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprën penale “Ndihma për kalim të paligjshëm të kufirit”, njofton policia.
