Anneliese Dodds, ministrja e Zhvillimit Ndërkombëtar, ka dhënë dorëheqje nga posti i saj, duke reaguar ndaj vendimit të kryeministrit britanik, Keir Starmer për të përgjysmuar buxhetin e ndihmës ndërkombëtare në favor të rritjes së shpenzimeve për mbrojtjen.
Si deputete laburiste dhe anëtare e kabinetit, Dodds paralajmëroi se shkurtimi i fondeve për zhvillimin do të forconte pozicionin e Rusisë, e cila po zgjeron agresivisht praninë e saj globale, si dhe do të ndihmonte Kinën në përpjekjet e saj për të riformuluar rregullat ndërkombëtare.
Sipas saj, me një buxhet të reduktuar, qeverisë do t’i jetë e pamundur të mbajë angazhimet e saj për ndihmën në Gaza, Sudan dhe Ukrainë.
Megjithëse e mbështeti rritjen e shpenzimeve për mbrojtjen, duke argumentuar se situata globale pas pushtimit të Ukrainës nga Rusia ka ndryshuar ndjeshëm, Dodds besonte se strategjia e qeverisë duhej të përfshinte edhe rishikimin e rregullave fiskale dhe sistemit të taksave për të siguruar fonde shtesë, në vend të mbështetjes vetëm te shkurtimet buxhetore.
Ajo tha se ishte informuar për vendimin e Starmerit vetëm disa ditë më parë, por vendosi të mos dorëhiqej menjëherë për të mos penguar vizitën e kryeministrit në Uashington, ku ai kërkonte garanci për Ukrainën nga presidenti amerikan, Donald Trump.
Në letrën e saj të dorëheqjes, Dodds e përshkroi vendimin për shkurtimet si një hap që do të ndikojë negativisht jo vetëm në ndihmën humanitare, por edhe në reputacionin e Mbretërisë së Bashkuar në arenën ndërkombëtare.
Ajo shtoi se vendimi qeveritar do të çonte në tërheqjen e Britanisë nga rajone kyçe si Afrika, Karaibet dhe Ballkani Perëndimor, duke krijuar një boshllëk që do të shfrytëzohej nga aktorë të tjerë ndërkombëtarë.
Në fund, Dodds theksoi se këto masa do të kenë pasoja të drejtpërdrejta për njerëzit në nevojë, duke i privuar ata nga ushqimi dhe kujdesi shëndetësor. Sipas saj, ky veprim reflekton një qasje të ngjashme me atë të administratës Trump në lidhje me ndihmat ndërkombëtare, duke rrezikuar pozicionin moral dhe diplomatik të Britanisë në botë.
