Pas Tiranës, samiti i Komunitetit Politik Evropian do të mblidhet në Danimarkë më 2 tetor për takimin e tij të shtatë, ku pritet të marrin pjesë 47 krerë shtetesh nga e gjithë Evropa.
Në këtë takim ku do të jetë i pranishëm edhe Kryeministri i Shqipërisë, Edi Rama, sipas agjendës së bërë publike, mësohet se pas seancës plenare do të zhvillohen disa diskutime në tryezë të rrumbullakët.
“Këto diskutime do të përqendrohen në aspekte të ndryshme të situatës së sigurisë në Evropë, duke përfshirë kërcënimet tradicionale dhe hibride, sigurinë ekonomike, si dhe çështjet e migracionit,” thuhet në njoftim.
Nga 47 shtetet pjesëmarrëse në samit, 27 janë vende anëtare të Bashkimit Evropian.
Në takim marrin pjesë “Shqipëria, Andorra, Armenia, Azerbajxhani, Bosnjë-Hercegovina, Gjeorgjia, Islanda, Kosova, Lihtenshtajni, Moldavia, Monako, Mali i Zi, Maqedonia e Veriut, Norvegjia, San Marino, Serbia, Zvicra, Turqia, Ukraina dhe Britania e Madhe.”- bëhet e ditur në njoftim.
Sakaq bëhet e ditur se, Bashkimi Evropian do të përfaqësohet nga Presidenti i Këshillit Evropian, António Costa, i cili do të bashkëkryesojë takimin me Kryeministren e Danimarkës, Mette Frederiksen.
Në ftesën drejtuar udhëheqësve të shteteve pjesëmarrëse për këtë takim, evidentohet fakti se “ndodhemi në vitin e katërt të luftës agresive të Rusisë kundër Ukrainës. Në këtë kontekst, është thelbësore të vazhdojmë mbështetjen politike dhe ekonomike për Ukrainën.”
Programi i punimeve parashikon mbërritjen e delegacioneve në orën 08:15, seancën plenare hapëse në 10:00, fotografinë e përbashkët në 11:30, tryezat e rrumbullakëta në 12:00, takimet bilaterale në 13:00 dhe sesionin përmbyllës në orën 15:00.
Komuniteti Politik Evropian synon të nxisë dialogun politik dhe bashkëpunimin ndërmjet vendeve evropiane për të adresuar çështje me interes të përbashkët.
Qëllimi i tij është të forcojë sigurinë, stabilitetin dhe prosperitetin në kontinentin evropian, duke krijuar një hapësirë të përbashkët për koordinim politik.
Ky samit vjen një ditë pas takimit informal të Këshillit Evropian, që do të mbahet më 1 tetor në Kopenhagë, për të diskutuar mënyrat e forcimit të mbrojtjes së përbashkët të Evropës si dhe mbështetjen për Ukrainën.
Takimi i mëparshëm u zhvillua në Tiranë më 16 maj të këtij viti, ndërsa takimet e radhës janë planifikuar të mbahen në Armeni dhe Irlandë.
