Këta ushtarë të Serbisë janë fare pranë territorit të Kosovës. Nuk bëhet fjalë për një kërcënim, por për një patrullim të zakonshëm të tyre bashkë me forcat e KFOR-it.
Në arsyetimin e bërë publik nga Forcat e Armatosura të Serbisë thuhet se kanë monitoruar atë që e konsiderojnë vijë administrative me Kosovën, konkretisht kufirin mes vendeve.
Por Ministria e Mbrojtjes e Beogradit provokon duke e konsideruar Kosovën, një krahinë të Serbisë.
“Kemi shkëmbyer informacione për gjendjen në terren dhe u mblodhën të dhëna që mund të jenë të rëndësishme për realizimin e detyrave në periudhën e ardhshme”, lexohet në njoftimin e ushtrisë serbe.
Nënkoloneli foli për reagimin ndaj ngjarjeve që kërkojnë përgjigje urgjente.
“Linjat e krijuara të komunikimit mundësojnë shkëmbimin e vazhdueshëm të informacionit, nëse bëhet fjalë për zbatimin e rregullt rë detyrave ose për ngjarje që kërkojnë reagim urgjent i njërës nga palët. Në zonën e alternuar të përgjegjësisë së Forcave të Armatosura të Serbisë… dhe fushën e përgjegjësisë së KFOR-it, besimi i ndërsjellë është ndërtuar. Gjatë takimeve shkëmbehen informacione për aktualitetin, gjendjen e sigurisë në territorin e krahinës autonome të Kosovës dhe Metohisë dhe vijat më të gjata administrative. Në takime pajtohemi për masat për përmirësimin e gjendjes së sigurisë”, tha Gjeorgje Petroviç.
Në njoftimin e ushtrisë serbe thuhet se patrullimet e njëkohshme me KFOR-in kanë ndikuar në uljen e numrit të aktiviteteve të paligjshme në kufirin mes Kosovës dhe Serbisë dhe përmirësimin e situatës së sigurisë.
