Partia Demokratike ka paditur Ministrin e Brendshëm, Sandër Lleshaj dhe një sërë punonjësish të policisë së shtetit për akuzën e “shpërdorimit të detyrës”.
Padia e depozituar në Prokurorinë e Tiranës nga ana e Sekretarit të Përgjithshëm të PD-së, Gazmend Bardhi, argumenton se në protestën e të shtunës së kaluar, policia ka shkelur ligjin dhe nuk ka respektuar standardin e përdorimit të forcës në mënyrë proporcionale, por përkudrazi ka hedhur “mjete të helmimi masiv dhe ujë me presion drejt protestuesve”.
PD ka kërkuar kësisoj pezullimin nga detyra të të akuzuarve nga demokratët, përfshi këtu dhe Sandër Lleshajn.
“Është e provuar se gjatë zhvillimit të protestës Policia e Shtetit, duke shpërdorur detyrën, ka dhunuar dhe sulmuar me mjete të helmimit masiv dhe ujë me presion qytetarë, të cilët po protestonin paqësisht
Qëllimi i Policisë ka qenë pengimi i zhvillimit të protestës, duke hedhur mjete të helmimit masiv dhe ujë me presion ndaj të gjithë protestuesve, jashtë rregullave dhe rrethanave të lejuara nga ligji. Pamjet filmike provojnë një veprim kriminal të punonjësve të Policisë së Shtetit, që sulmojnë me gaz edhe qytetarë që janë të shtrirë në rrugë për shkak të problemeve shëndetësore apo qytetarë që përpiqen t’u vijnë në ndihmë atyre. Kjo është qartazi, jo vetëm shpërdorim detyre, por edhe një tentativë për të rrezikuar seriozisht jetën dhe shëndetin e qytetarëve”-shkruhet në kallëzim.
Por në padinë drejtuar Prokurorisë, PD nuk i ka kursyer dhe akuzat kundrejt organit të akuzës.
“Prokuroria nënshkruan çdo urdhër arresti që i vendoset përpara nga Policia e Shtetit, duke u përdorur si mekanizëm presioni dhe shantazhimi ndaj qytetarëve të pafajshëm, të cilët arrestohen për disa ditë, pa kryer asnjë shkelje dhe shpesh edhe pa qenë fare në protestë.
Trajtimi i këtij kallëzimi penal dhe mbi të gjitha hetimi me profesionalizëm i dhunës së ushtruar nga Policia e Shtetit, është një tjetër provë nëse në Shqipëri, organi i prokurorisë është institucion i pavarur dhe i paanshëm, siç përcakton Kushtetuta dhe ligji, apo është zyrtarisht degë e pushtetit kriminal të kësaj Qeverie ilegjitime.”-thuhet në dokumentin shoqërues të kallëzimit penal të Partisë Demokratike.
