Partia Demokratike deklaroi sot se “Edi Rama, Ilir Meta dhe Sali Berisha kanë dalë hapur tashmë kundër PD dhe Lulzim Bashës”.
Nëpërmjet një njoftimi për mediet, zyra e shtypit e PD-së ka publikuar edhe një video ndërsa shprehet se “ata janë e shkuara ndaj duan ta mbajnë peng Shqipërinë”.
“Ata e dinë që janë e shkuara dhe mundohen të mbajnë njëri-tjetrin. Trekëndëshi i Bermudës dhe oligarkët që i mbështesin hapur me aktet dhe retorikën e tyre përçarëse të demokratëve. Atyre ju intereson qëndrimi në vendnumëro, ju intereson Shqipëria e së shkuarës, jo e së ardhmes”, thekson PD.
Gjithashtu, PD shprehet se “demokratët dhe Shqiptarët janë bashkë në këtë betejë kundër pakicës 30-vjeçare të tranzicionit që po e mban Shqipërinë peng. Ne kemi zgjedhur të ndërtojmë të ardhmen më të mirë”.
