Partia Demokratike zyrtare është sërish në një moment delikat në lidhje me përfaqësimin ligjor të saj. Dhe mesa duket, zgjedhja e Lulzim Bashës kryetar në një proces të anuluar nga Këshilli Kombëtar qe nuk njihet nga zoti Basha, do të çojë PD në një tjetër proces gjyqësor.
Deputeti demokrat Bledion Nallbati, i ngarkuar për të ndjekur procedurat në gjykatë, tregoi për emisionin “Pa Censurë” rrugën ligjore që do të ndiqet nga grupimi i tyre.
“Fakti që ata (grupi i zotit Basha) nuk e njohin vendimin legjitim të Këshillit Kombëtar, do të thotë që do të shkojmë në gjykatë, siç ka ndodhur.
Ne kemi depozituar në gjykatë vendimet e Këshillit Kombëtar dhe gjykata duhet të regjistrojë ndryshimet e bëra sipas vendimit të Këshillit Kombëtar. Pra, që nuk ka zgjedhje në PD”,- tha Nallbati, i cili iu përgjigj edhe pyetjes nëse gjykata e merr apo jo parasysh vendimin e Këshillit Kombëtar për të anuluar procesin e zgjedhjes së zotit Basha.
“Zoti Basha ka mbledhur 174 anëtarë të Këshillit Kombëtar, që nuk janë më shumë sesa gysma e Këshillit Kombëtar, siç e kërkon statuti: Një mbledhje pa kuorum nuk është mbledhje. Vendimet në atë Këshill nuk ekzistojnë dhe këtë gjykata besoj e ka të qartë dhe s’e mohon dot.
Ndërkohë këtu janë 254 anëtarë dhe secili ka nënshkruar me vullnetin personal. Gjykata nuk mund të thotë se ky vendim nuk ekziston. Nuk e di kur e merr këtë vendim gjykata, pasi partia është në një proces tjetër gjyqësor.
Duhet të zgjidhet ai proces, që t’i vijë radha këtij procesi tani”,- u shpreh deputeti Bledion Nallbati, i cili tregon edhe synimin e grupimit të drejtuar nga Gazment Bardhi për mënyrën e përfaqësimit të PD.
“Grupi parlamentar do të nisë një proces konsultimi me të gjithë anëtarësinë, pa asnjë dallim, për të vendosur sesi të procedohet me partinë në të ardhmen. Ky proces do të nisë së shpejti” – tha zoti Nallbati.
Ai konfirmoi se grupi i drejtuar nga Gazment Bardhi aktualisht ka 15 deputetë, ndërsa grupimi i zotit Basha është me 10 deputetë.
