Parlamenti Europian ka votuar në favor të vendosjes së 15 kushteve para hapjes zyrtare të negociatave të anëtarësimit me Shqipërinë.
Kjo është konfirmuar pas anonçimit të rezultatit të votimit lidhur me amendamentet e rezolutës së eurodeputetit Tonino Picula, mbi integrimin europian të vendeve të Ballkanit Perëndimor, nga zëvendëspresidenti i Parlamentit Europian, Fabio Massimo Castaldo.
Amendamenti 42 i prezantuar nga eurodeputetja Kinga Gal e Partisë Popullore Europiane, ka të bëjë me kushtëzimin për procesin e hapjes së negociatave të anëtarësimit të Shqipërisë në Bashkimin Europian.
Në këtë amendament thuhet:
“ Rekomandimi i Parlamentit Europian për Këshillin e ministrave, Komisionin Europian dhe zëvendëspresidentit të tij nënvizon 15 kushtet e vendosura nga Këshilli i ministrave, që Shqipëria duhet të përmbushë para zhvillimit të konferencës së parë ndërqeveritare me shtetet anëtare të Bashkimit Europian”.
Ky amendament u votua me 388 vota pro, 280 vota kundër dhe 19 abstenime.
Në rezolutën e Parlamentit Europian, kushtet nuk janë të specifikuara duke qenë se ato janë bërë publike nga vendimi i Këshillit të ministrave i Bashkimit Europian të 24 marsit, të aprovuar dhe nga liderët europianë.
Parlamenti Europian bashkohet kështu tërësisht me 27 shtetet anëtare të Bashkimit Europian.
Ky është një akt i rrallë dhe i fortë politik për këtë institucion, që përgjithësisht i kundërvihet shteteve anëtare të Bashkimit Europian.
Po në këtë rezolutë theksohet, se dështimi i Këshillit Evropian për të hapur negociatat e anëtarësimit me Shqipërinë dhe Maqedoninë e Veriut, në qershor të vitit 2018, qershor të 2019 dhe tetor të 2019 ka patur një efekt të dëmshëm për zgjerimin.
15 kushtet që Shqipëria duhet të plotësojë:
1- Miratimi i reformës zgjedhore;
2- Funksionimi i Gjykatës Kushtetuese;
3- Funksionimi i Gjykatës së Lartë;
4- Finalizimi i ngritjes se strukturave kundër krimit të organizuar dhe anti-korrupsionit/Funksionimi i SPAK;
5- Forcimi i luftës kundër korrupsionit dhe krimit të organizuar, në bashkëpunim me vendet anëtare dhe nëpërmjet Plan Veprimit për adresimin e krimit financiar;
6- Ulja e numrit të azilkërkuesve, ku një nga masat është bashkëpunimi me Hollandën, Francën, Britaninë e Madhe, Gjermaninë, Italinë, Irlandën;
7- Rishikimi i Ligjit të Medias në linjë me rekomandimet e Komisionit të Venecies;
8- Vazhdimi i Reformës në Drejtësi;
9- Track Records-Iniciimi dhe përfundimi i proceseve gjyqësore të shkallës së parë të zyrtarëve të lartë dhe politikanëve;
10- Progres në reformën e administratës publike;
11- Zbatimi i reformës zgjedhore ku përfshihen, financimi transparent i partive, administrimi i paanshëm i procesit dhe procesi i rregullt;
12- Vendimi për ligjshmërinë e zgjedhjeve lokale 2019 që kërkon plotësimin e Gjykatës Kushtetuese;
13- Miratimi i Akteve nënligjore të Ligjit për Pakicat Kombëtare ku janë disa VKM;
14- Miratimi i Ligjit (të amenduar) të Censusit;
15- Avancimi i procesit të regjistrimit të pronave.
