Pentagoni do të ofrojë një pako ndihmëse ushtarake në vlerë të 125 milionë dollarëve për Ukrainën, ku përfshihen dy anije të armatosura patrulluese si ndihmë për mbrojtjen e ujërave territoriale.
Përpos dy anijeve të vogla të tipit “Mark VI”, në këtë pako përfshihen edhe radarët për artileri, pajisje për pamje satelitore dhe kapacitete analizuese dhe pajisje për përkrahjen e trajtimit mjekësor ushtarak dhe procedurat e evakuimit.
Pentagoni gjithashtu tha se pjesa tjetër prej 150 milionë dollarëve si ndihmë ushtarake, e miratuar nga Kongresi i ShBA-së, nuk do të dhurohet derisa Departamenti i Shtetit dhe Departamenti i Mbrojtjes të kenë mundësi t’ua vërtetojnë ligjvënësve se Ukraina ka bërë progres të konsiderueshëm rreth reformave në fushën e mbrojtjes.
“Departamenti e inkurajon Ukrainën që të vazhdojë të miratojë reforma që e fuqizojnë kontrollin civil të ushtrisë, që promovojnë rritje të transparencës dhe llogaridhënies në industrinë e mbrojtjes dhe ta modernizojë sektorin e mbrojtjes në fusha tjera kyçe në vijë me parimet dhe standardet e NATO-s”, thuhet në deklaratën e Pentagonit, të publikuar të hënën.
Ukraina është përfshirë në mosmarrëveshje me Rusinë që nga viti 2014, kur forcat ruse e aneksuan Gadishullin e Krimesë dhe i përkrahën separatistët në lindje të Ukrainës. Nga ky konflikt deri më tani janë vrarë mbi 13.200 persona.
