Nuk është e vërtetë që shqiptarët reagojnë vetëm ndaj skandaleve me sfond moral-seksual. Shqiptarët nuk reagojnë as ndaj skandaleve me sfond moral-seksual!
Natyrisht këto të fundit shoqërohen me një eksitim publik më intensiv, më masiv, por eksitimi publik nuk duhet ngatërruar me reagimin. Reagim do të thotë ndëshkim. Dhe ne e kemi provuar dhe në të shkuarën që nuk ndëshkojmë as për këto lloj skandalesh.
Sa prej nesh do të ndryshojmë votën tonë për shkak të ngjarjes me videon erotike? – Pothuajse askush. Dibra, përpara disa vitesh, është prova që konfirmon tezën. Aty madje u përmbys gjithë prospekti.
Dhe pothuajse askush nuk do ta ndryshojë votën për shkak të kalimit që iu bë dje Portit të Durrësit në GJK, ashtu sikundër askush nuk e ndryshoi për shkak të inceneratorëve.
Konstrukti ynë moral, në një shumicë dërrmuese, është thjesht një maket kartoni që shërben thjesht për pamje të jashtme. Kollonat morale që duhet të jenë baza e ndërtimit dhe progresit të shoqërisë, në një shumicë dërrmuese, janë thjesht kuboidë letre.
I mbajmë të dobta, sepse kështu e kemi më të lehtë për t’i rrëzuar kur dikush na ofron ca para në këmbim…ai që ka bërë një skandal seksual, vjen të jep ca lekë, apo një favor që përkthehet në lekë që ti të rrëzosh kollonat e tua morale dhe t’i japësh prapë votën. Dhe ti e bën..
Jemi shumë të varfër jashtë edhe brenda. Jemi aq të varfër, saqë e vetmja gjë që na ka mbetur për të shitur është morali.
Prandaj ne nuk reagojmë për asgjë.
