Reshjet e dendura të shiut kanë shkaktuar dëmtime dhe përmbytje edhe në Kosovë.
Si pasojë e situatës së rëndë meteorologjike është përmbytur lagjja “Dardania” në qytetin e Gjakovës.
Deri më tani nga mediat kosovare janë raportuar situata të rënduara në hyrje-daljet e qytetit, tek rruga “Qazim Bakalli”, tek Ura që lidh Bllokun e Ri me Shkugëzen, ka bllokim të rrugëve “Fehmi Agani” dhe “Gaspër Karaqi” si dhe paralagjia Brekoc.
Disa banorë kanë pasur nevojë edhe për evakuim, kurse numri i shtëpive të përmbytura dhe tokat bujqësore është i madh.
Ndërkohë Instituti i Hidrometeorologjikes së Kosovës (IHMK) ka njoftuar se moti me shi do të vazhdojë edhe nesër.
“Reshjet e shiut, të cilat pritet të fillojnë gjatë orëve të pasdites së datës 06/01/2021, me intensitet mastarë deri të lartë, fillimisht do të përfshinë pjesën perëndimore të vendit (zonën malore të Alpeve Shqiptare), të cilat në vazhdim do të përfshinë Rrafshin e Dukagjinit dhe pjesë të tjera të vendit. Kjo situatë do të vazhdoj për disa ditë (09/01/2021), ku si pasojë e intensitetit më të lartë të tyre, në disa zona mund të paraqiten vërshime të shpejta, të cilat potencialisht shkaktojnë ngritje të shpejta të nivelit të ujit nëpër lumenj e sidomos nëpër rrjedhat ujore të cilat kanë karakter të rrëkeve”, thuhet në njoftimin e IHMK’së. /Opinion.al
