Pavarësisht premtimeve dhe retorikës së fortë të politikanëve konservatorë për të ndaluar gomonet që mbërrijnë me refugjatë, kjo vijon të jetë një mision i pamundur.
Me përmirësimin e motit, sipas Mark White editor i çështjeve të Brendshme për GB News, paraditen e kësaj të diele në brigjet angleze mbërritën 8 gomone me 300 emigrantë.
Sipas GB News, ‘taksitë’ e La Manshit ishin nisur nga Gravelines afër Dunkirk në bregdetit francez. Ky është numri më i madh i emigrantëve, mbërritur me gomone këtë fillim viti.
‘Përmirësimi motit të shtunën i ka dhënë mundësi grupeve kriminale në Francë për të rifilluar trafikun me gomone’, thekson gazetari Mark White.
Gomonia e fundit me 44 emigrantë mbërritur në brigjet angleze ishte më 2 janar pavarësisht detit të trazuar me dallgë. Mbetet e paqartë për momentin nëse tek këta 300 persona mbërritur me gomone këtë të diel ka edhe shqiptarë.
Gjatë vitit të shkuar por edhe të Enjten e 19 janarit 2023, Ministria e Brendshme angleze ‘Home Office’ tha se mes 26 personave të dëbuar drejt Tiranës kishte edhe nga ata të mbërritur ilegalisht me gomone.
Sipas ‘Home Office’, vitin e shkuar me gomone në Angli mbërritën 44,000 persona mes tyre rreth 13.000 shqiptarë.
