Ka pasur një hap përpara në negociatat ndërmjet Shteteve të Bashkuara dhe Bashkimit Evropian, me synimin për të arritur një marrëveshje deri më 9 korrik. Megjithatë ende nuk është arritur një akord përfundimtar.
Ky është konkluzioni i vizitës së djeshme në Uashington të komisionerit të BE-së për Tregtinë, Maros Sefcoviç, i cili u takua me Sekretarin amerikan të Thesarit, Scott Bessent, homologun e tij, Howard Lutnick dhe ambasadorin Jamieson Greer.
“Synimi është të arrijmë maksimumin e mundshëm. Një marrëveshje e drejtë për të dyja palët, që u jep më shumë parashikueshmëri dhe qartësi kompanive për të planifikuar aktivitetet tregtare për pjesën tjetër të vitit dhe më tej”, ishte shprehur përpara vizitës përfaqësuesi i Brukselit.
Duke theksuar rëndësinë e aleancës ndërmjet BE-së dhe SHBA-së, ai shtoi se “është gjithmonë një shenjë e mirë kur kalojmë nga shkëmbimi i opinioneve në procesin e hartimit, por duhet fokus maksimal për rezultate, sepse jemi ndër partnerët më të mëdhenj tregtarë në botë.”
Në kuadër të një kompromisi të mundshëm, BE-ja është e gatshme të pranojë tarifa doganore deri në 10% dhe të rrisë blerjet e armëve dhe mallrave të tjerë amerikanë si gazi natyror. Në këmbim, kërkon lehtësim ose heqje tarifash për produkte si alumini (aktualisht 50%), automjetet dhe pjesët e tyre (25%).
Nga ana tjetër, SHBA-të kërkojnë heqjen e taksave që disa vende evropiane vendosin ndaj gjigantëve digjitalë amerikanë.
Duke folur për CNBC, sekretari amerikan i Thesarit Bessent u tregua i matur.
“E takova homologun tim evropian. Ka shumë elementë në lojë. Vendimin e merr presidenti Trump. Do të punojmë intensivisht gjithë fundjavën. Do të shohim çfarë mund të arrihet”, tha Bessent.
Ai shtoi gjithashtu se, me 147 mijë vende pune të reja në qershor, ekonomia amerikane mbetet e fortë.
“Tarifat nuk kanë dëmtuar ekonominë tonë”, tha ai.
Presidentja e Komisionit Evropian, Ursula von der Leyen, nga Aarhus në Danimarkë, deklaroi se synimi i BE-së është “një marrëveshje parimore”, si ajo me Britaninë e Madhe.
Por ajo theksoi edhe vështirësitë.
“Me një fluks tregtar prej 1.5 trilionë euro, është e pamundur të përfundojmë detajet brenda 90 ditëve, siç kërkon Trump. Po punojmë për një zgjidhje të negociuar, por jemi të përgatitur edhe për një dështim”, tha ajo.
Von der Leyen konfirmoi se BE-ja ka përgatitur një listë kundërmasash dhe është gati t’i aktivizojë për të mbrojtur interesat evropiane, nëse marrëveshja dështon.
Në këtë kuadër, BE-ja mendon të ndjekë modelin britanik, me një marrëveshje kornizë që do të ndalonte hyrjen në fuqi të tarifave, duke lënë detajet për t’u negociuar më vonë.
Por Brukseli përballet edhe me ndasi të brendshme: Gjermania dhe Italia shtyjnë për një zgjidhje të shpejtë, edhe nëse kërkon lëshime, ndërsa Franca dhe Spanja kërkojnë që BE-ja të rezistojë dhe të kundërpërgjigjet.
“Një marrëveshje e mirë është ajo që arrihet sa më shpejt, me tarifa sa më të ulëta dhe që është e drejtë dhe e ekuilibruar”, tha Macron.
