Presidenti i Madagaskarit, Andry Rajoelina, ka konfirmuar se po strehohet në një “vend të sigurt” pas disa atentateve të dështuar ndaj tij, ndërsa situata politike në vend vijon të jetë e tensionuar. Në një fjalim drejtuar kombit përmes rrjetit social Facebook, Rajoelina, hodhi akuza duke deklaruar se një grup ushtarakësh dhe politikanësh kishin planifikuar të vrisnin, duke përmendur përpjekjet për grusht shteti që kanë shqetësuar vendin që nga 25 shtatori.
Situata tensionuese në Madagaskar ka ardhur pas disa javësh protestash të organizuara nga “Gjenerata Z Mada”, një lëvizje kryesisht e udhëhequr nga të rinjtë, që kërkojnë dorëheqjen e presidentit për shkak të papunësisë, korrupsionit dhe krizës së energjisë dhe ujit.
Rajoelina u përpoq të qetësonte qytetarët me shkarkimin e qeverisë, por pa sukses. Gjatë ditëve të fundit, ka pasur raporte për përplasje të dhunshme, ku të paktën 22 persona humbën jetën dhe më shumë se 100 të tjerë u plagosën.
Rajoelina nuk e ka zbuluar ende vendndodhjen e tij, por disa burime kanë raportuar se ai mund të ketë përdorur një avion ushtarak francez për të lënë vendin. Fjalimi i tij në Facebook erdhi pasi ushtarët kërcënuan të pushtonin televizionin shtetëror.
Në anën tjetër, forcat ushtarake, të udhëhequra nga një grup që dikur mbështeti ardhjen e Rajoelinës në pushtet, kanë shpallur një komandë të re dhe disa oficerë u bashkuan me protestuesit, duke përshkallëzuar edhe më shumë tensionet. Pas një takimi të komandantëve ushtarakë, Gjenerali Demosthene Pikulas siguroi publikun se forcat e sigurisë do të punonin për të ruajtur rendin.
Partia opozitare më e madhe, TIM, ka kërcënuar se do të nisë procedurat për shkarkimin e Rajoelinës për “braktisje të postit”. Disa nga zyrtarët e tij të lartë janë larguar gjithashtu nga vendi drejt ishullit fqinj të Mauritiusit.
Madagaskari po kalon një periudhë të pasigurisë, e ngjashme me atë që ka përjetuar më parë gjatë krizave të mëdha politike që datojnë që nga fitimi i pavarësisë në vitin 1960.
