Sapo mori telefonin në dorë, kryeministri Britanik Boris Johnson telefonoi partneren e tij Carrie Symonds e cila është shtatzënë.
Boris Johnson doli mbrëmë nga terapia intensive dhe tashmë ndodhet në një dhomë të veçantë në spitalin Saint Thomas ku po merr trajtimet, pasi u infektua me koronavirus.
Sipas mediave britanike, kryeministri nuk kishte telefon në dhomë dhe i është dhënë pasi e kërkoi mëngjesin e sotëm dhe nuk ka hezituar të telefonojë të parën partneren e tij, e cila gjithashtu u prek nga koronavirusi, por fatmirësisht është në gjendje të mirë shëndetësore bashkë me bebin që mban në bark.
Johnson 55 vjeç falenderoi stafin e NHS për shërbimin që i dhanë dhe duhet pranuar që ai ishte në rrezik për jetën, pasi vetëm pak e ndante nga intubimi, që në të shumtën e rasteve, pacientët që kanë shkuar në intubim, nuk kanë shpëtuar.
Johnson ka tre javë që nuk e takon partneren 32 vjeçare dhe pasi telefonoi atë, ka folur edhe me familjarët e tij.
Kryeministri Britanik u infektua me datë 27 mars. Qëndroi disa ditë në shtëpi, por për shkak të gjendjes së rënduar u shtrua në spital. Katër ditë i kaloi në trajtim intensiv.
