Në 76-vjetorin e lindjes së ish-Presidentit Ibrahim Rugova, është bërë inaugurimi i Kompleksit Memorial “Ibrahim Rugova” në Istog.
Në inaugurimin e Kompleksit “Ibrahim Rugova” kanë marrë pjesë kryeministri Avdullah Hoti, kryetari i Istogut Haki Rugova, vajza e ish-Presidentit Teuta Rugova, e anëtarë tjerë të Lidhjes Demokratike të Kosovës.
Hoti ka thënë se Rugova, një djalë i rritur pa babanë e rrëmbyer nga komunistët, do të kthehej në një simbol të Kosovës që formimin e tij intelektual e vuri në shërbim të shtetndërtimit të Kosovës, në një kohë të shpërbërjes së rrëmujshme të Jugosllavisë.
“Rugova në frymën e Bogdanit dhe pasuesve të tij e drejtoi Kosovën drejt Europës. Rugova e mori në dorë fatin e populli të Kosovës në një periudhë të rëndë. Kërkesa e kamotshme për mëvetësi u legalizua nga LDK-ja dhe prijësi i saj Ibrahim Rugova”.
Me thënien e Rugovës, “Shtëpia pa miq nuk mbahet”, Hoti ka thënë se do të vazhdojë amanetin e tij për të mbajtur lidhjet miqësore me vendet aleate të Kosovës, veçanërisht me SHBA-në dhe se do të mundohet të arrijë synimet për anëtarësim të plotë në organizatat ndërkombëtare.
Punimet për Kompleksin Memorial “Ibrahim Rugova” në Istog kanë kushtuar 350 mijë euro.
Kuvendi i Kosovës ka ndarë 200 mijë euro, ndërsa 150 mijë ka ndarë Komuna e Istogut.
