Selektori i Përfaqësueses së Zvicrës, Valdimir Petkoviq, ka thënë fjalë të mira për dyshen shqiptare te helvetët, Granit Xhaka dhe Xherdan Shaqiri.
Petkovic këto komente i bëri pas publikimit të listës së të ftuarve për tre ndeshjet e muajit mars, në udhëtim te Bullgaria, si vendas me Lituaninë dhe miqësoren me Finlandën. Emri i Xhakës dhe Shaqirit nuk mungoi në këtë listë.
“Graniti tregoi personalitet pasi pothuajse u shkatërrua nga episodi kur iu mor shiriti i kapitenit tek Arsenali. Ai u kthye përsëri dhe mori respekt nga ata që e kritikuan. Ai është përsëri një nga lojtarët më të rëndësishëm, nëse jo më i rëndësishmi, tek Arsenali”, theksoi Petkoviq.
Tekniku 57-vjeçar shprehu lëvdata edhe për futbollistin e Liverpoolit, Xherdan Shaqiri, që deri pak kohë më parë po vuante për minutazh te skuadra e Jurgen Klopp.
“Ashtu si Graniti, edhe Xherdani ka treguar se është një karakter i fortë. Ai luajti mjaft shumë kohëve të fundit. Ai ishte pak i pafat që nuk po luante. Xherdan tregoi praninë dhe personalitetin e tij, luajti rolin e tij mirë dhe gjithashtu punoi shumë për ekipin”, deklaroi Petkoviq.
