Momenti kur efektivi i policisë kufitare, Erion Goxharaj qëllon tek këmbët 45-vjeçarin Lorenc Kosta, është kapur nga kamerat e sigurisë së disa bizneseve, që kanë fiksuar se si Goxharaj, 46 vjeç, baba i dy fëmijëve, i cili ka shërbyer më herët dhe si komandant në repartin “Shqiponja” qëlloi me pistoletën e shërbimit, Kostën.
Për prokurorinë ngjarja është klasifikuar si vrasje me paramendim e mbetur në tentativë ndërsa ish-efektivi tashmë akuzohet dhe për armëmbajtje pa leje.
Burime pranë grupit hetimor thanë se ky është fundi i një serie debatesh të Goxharajt me të plagosurin ku mësohet se herë pas here ai i ka kërkuar Kostës që të ndalojë ngacmimet ndaj partneres së tij pasi kjo e fundit ishte ankuar vetë tek efektivi.
Vetë drejtori i Policisë së Tiranes, Tonin Vocaj i bëri thirrje 46-vjeçarit të vetëdorëzohet ndërsa gjendja e të plagosurit është e stabilizuar në spitalin e Traumës. Për kapjen e Goxharajt policia ka ofruar dhe 10 mijë euro për këdo që jep informacione mbi vendndodhjen e tij.
