Presidentja Vjosa Osmani ka komentuar nënshkrimin e Planit të Paqes për Gazën si fillimin e një kapitulli të ri për paqen në Lindjen e Mesme.
Ajo në një postim në X, ka vlerësuar udhëheqjen vendimtare të presidentit amerikan Donald Trump dhe përkushtimin e liderëve për arritjen e kësaj marrëveshjeje.
“Sot shënohet fillimi i një agimi të ri dhe një kapitulli të rëndësishëm për paqen në Lindjen e Mesme me nënshkrimin e Planit të Paqes për Gazën. Përmes lidershipit vendimtar dhe të guximshëm të presidentit Donald Trump, dhe angazhimit të të gjithë udhëheqësve që punuan pa u lodhur drejt këtij qëllimi, ky moment shprese i shumëpritur është bërë realitet. Kjo marrëveshje ofron një rrugë për t’i dhënë fund viteve të vuajtjeve dhe pasigurisë, duke u dhënë familjeve të panumërta mundësinë për të jetuar në siguri, dinjitet dhe liri.”
“Ne i nxisim të gjitha palët të shfrytëzojnë këtë mundësi dhe të zbatojnë plotësisht planin e paqes”, ka shtuar Osmani.
Më shumë se njëzet vende morën pjesë në samitin e Gazës të mbajtur në Sharm el-Sheikh të Egjiptit, ku presidenti i SHBA-së Donald Trump dhe udhëheqësit botërorë nënshkruan një marrëveshje armëpushimi.
Lista e pjesëmarrësve përfshinte përfaqësues nga Armenia, Azerbajxhani, Bahrejni, Kanadaja, Qiproja, Egjipti, Bashkimi Evropian, Franca, Gjermania, Greqia, Hungaria, India, Indonezia, Iraku, Italia, Japonia, Jordania, Kuvajti, Holanda, Norvegjia, Omani, Pakistani, Autoriteti Palestinez, Paraguai, Katari, Arabia Saudite, Spanja, Turqia, Emiratet e Bashkuara Arabe dhe Mbretëria e Bashkuar.
Samiti përfshinte gjithashtu sekretarin e Përgjithshëm të Ligës Arabe Ahmed Aboul Gheit, sekretarin e Përgjithshëm të OKB-së Antonio Guterres, presidentin e FIFA-s Gianni Infantino dhe ish-kryeministrin britanik Tony Blair.
Një marrëveshje paqeje për Gazën u arrit pas një takimi të pazakontë dhe dramatik të mërkurën e kaluar midis të dërguarve të Trump dhe udhëheqësve të Hamasit.
Një ditë para takimit, Trump u dha autorizim privat në Zyrën Ovale Witkoff dhe Kushner për t’u takuar me udhëheqësit e Hamasit, nëse ishte e nevojshme, për të nënshkruar marrëveshjen. Me të mbërritur në Sharm el-Sheikh, Witkoff informoi ndërmjetësit e Katarit, Egjiptit dhe Turqisë për dritën jeshile të Trump.
Pengesa kryesore për arritjen e një marrëveshjeje ishte frika e udhëheqësve të Hamasit se Izraeli do të vazhdonte luftën edhe pasi pengjet të liroheshin.
Për të mbyllur marrëveshjen, Steve Witkoff dhe Jared Kushner duhej të takoheshin personalisht me udhëheqësit e Hamasit dhe t’i siguronin ata drejtpërdrejt se Trump nuk do ta lejonte këtë, me kusht që grupi të mbante pjesën e tij të marrëveshjes, tha një nga burimet për Axios.
