Raportet e përsëritura për ndërhyrje ruse në hapësirën ajrore të NATO-s kanë intensifikuar diskutimet rreth qëndrimit të Shteteve të Bashkuara nëse Moska ndërmerr veprime të mëtejshme agresive kundër vendeve evropiane.
Në këtë kontekst, Presidenti i SHBA-ve Donald Trump u pyet të dielën nëse do të ndihmonte në mbrojtjen e anëtarëve të Bashkimit Evropian, në rast se Rusia do të përshkallëzonte armiqësitë.
“Po, do ta bëja. Do ta bëja“, u tha ai gazetarëve pak para se të nisej për shërbimin përkujtimor të Charlie Kirk.
I pyetur nëse ishte informuar për ngjarjet në Estoni, Trump konfirmoi se ishte informuar dhe shtoi: “Nuk na pëlqen“.
Sakaq, Këshilli i Sigurimit i OKB-së do të mblidhet sot në një seancë urgjente për të diskutuar për ndërhyrjet ruse në Estoni me tre aeroplanë që shkelën hapësirën ajrore.
Tre avionët MiG-31 hynë në hapësirën ajrore të Estonisë mbi Gjirin e Finlandës dhe qëndruan atje për rreth 12 minuta, njoftuan të premten Estonia dhe NATO.
Italia, e cila ka marrë përsipër një mision të NATO-s për të ruajtur qiellin mbi Detin Baltik, por edhe Suedia dhe Finlanda ngritën aeroplanë për të kapur tre ndërhyrësit.
