Një burrë 27-vjeçar boshnjak u arrestua në orët e para të mëngjesit në Essen të Gjermanisë, nën dyshimin për planifikimin e një sulmi terrorist islamist.
Sipas zyrës së prokurorit të Düsseldorfit, hetimi fillestar kishte të bënte me mashtrim tregtar, pasi 27-vjeçari, së bashku me të tjerë, dyshohet se kishte blerë pajisje elektrike të shtrenjta pa i paguar ato, me qëllim rishitjen e tyre.
Ai planifikonte t’i përdorte të ardhurat për të financuar sulme terroriste.
“Hetimet nga Shtabi i Policisë së Essen-it nën drejtimin e zyrës së prokurorit të Düsseldorf-it kanë zbuluar, përveç dyshimit për mashtrim të zakonshëm tregtar, indikacione se të ardhurat nga aktet mashtruese kishin për qëllim financimin e një sulmi terrorist me motiv islamist”, tha një zëdhënës i policisë, duke iu referuar shumave pesëshifrore që ishin mbledhur tashmë nga i dyshuari në këtë mënyrë.
27-vjeçari është shtetas i Bosnjës dhe Hercegovinës, ish-ushtar, dhe u arrestua në Essen, ndërsa në Dortmund u arrestua edhe një bashkëpunëtor i tij.
Megjithatë nuk është e sigurt nëse ai i dinte planet e mëtejshme të boshnjakut, i cili ishte tashmë nën mbikëqyrje nga Zyra Federale për Mbrojtjen e Kushtetutës.
Në agim, forcat speciale të policisë u kryen kontrolle në të paktën gjashtë apartamente në qytetet Essen, Dortmund, Düsseldorf dhe Sest.
