Kur Tha Peng u urdhërua që të qëllonte me armë automatike ndaj protestuesve për t’i shpërndarë ata në qytezën e Birmanisë, Khampat, më 27 shkurt, ai thotë se refuzoi.
“Ditën tjetër, një oficer më telefonoi dhe më pyeti nëse do të qëlloja me armë”, thotë ai. Polici 27-vjeçar refuzoi përsëri dhe më pas dha dorëheqje nga forcat e sigurisë, shkruan Reuters.
Më 1 mars, ai thotë se i la shtëpinë dhe familjen prapa vetes në Khampat dhe udhëtoi për tri ditë, kryesisht natën për të mos u kapur, para se të hynte në rajonin verilindor të Indisë, Mizoram.
“Nuk pata zgjedhje tjetër”, thotë Peng në një intervistë për agjencinë Reuters, duke folur përmes përkthyesit. Ai tregoi vetëm një pjesë të emrit për ta mbrojtur identitetin. Agjencia e pa kartelën identifikuese të policit, në të cilën dëshmohet emri i vërtetë.
Peng thotë se ai dhe gjashtë kolegë të tij nuk e respektuan urdhrin e 27 shkurtit nga një oficer i lartë, të cilit nuk ia përmendi emrin.
Përshkrimi i ngjarjeve nga ky polic ishte i ngjashëm me atë që është dhënë më 1 mars në Mizoram nga një polic tjetër dhe tre të tjerë që shkuan në Indi, sipas një dokumenti të klasifikuar të policisë.
Qeveria ushtarake e Birmanisë, e cila e mori pushtetin më 1 shkurt përmes rrëzimit me puç të një qeverie të zgjedhur në mënyrë demokratike, nuk i është përgjigjur kërkesës për koment.
Birmania është përfshirë nga protestat e përditshme që nga rrëzimi i qeverisë nga ushtria. Më shumë se 60 protestues janë vrarë dhe mbi 1.800 të tjerë janë arrestuar, sipas një grupi për të drejtat e njeriut.
