Policia angleze ka hapur me forcë derën e rezidencës së një oligarku rus në Londër, pasi kjo ndërtesë ishte pushtuar nga protestuesit.
Rezidenca i përket rusit Oleg Deripaska, i cili është në listën e sanksioneve të qeverisë britanike pas pushtimit të Ukrainës nga Rusia.
Protestuesit kishin hyrë brenda rezidencës së oligarkut rus dhe thanë se “duke marrë ndërtesën nën kontroll, duam të solidarizohemi me popullin e Ukrainës por edhe me popullin e Rusisë që nuk e pranoi kurrë këtë çmenduri”.
“Ju pushtoni Ukrainën, ne ju pushtojmë juve”, thanë protestuesit që hynë brenda rezidencës së oligarkut rus.
Protestuesit thanë se kjo ndërtesë do të shërbejë si qendër për të strehuar ukrainasit e larguar nga vendi i tyre për shkak të luftës.
Ata deklaruan se prona të tjera të oligarkëve rusë në Londër do të jenë në shënjestër të tyre.
