Policia e Shtetit njoftoi se dy shtetas shqiptarë të shpallur në kërkim ndërkombëtar, njoftoi Policia e Shtetit.Të akuzuar nga një gjykatë italiane si pjesëtarë të një organizate kriminale për trafikimin e lëndëve narkotike, në Lezhë janë arrestuar me qëllim ekstradimin drejt Italisë.
Ndalimi i tyre është bërë në kuadrin e operacionit “RUGANTINO”, ende në vijim në shtetin italian.
Bëhet fjalë për shtetasit e shpallur në kërkim ndërkombëtar T. K., alias A. I., 44 vjeç dhe P. B., alias P. T., 32 vjeç, të dy banues në Lezhë.
Ndaj këtyre 2 shtetasve, Gjykata e Brescia-s, Itali, ka caktuar masën e sigurisë “Arrest në burg”, për veprën penale “Organizata kriminale me qëllim trafikimin e lëndëve narkotike”, parashikuar nga Kodi Penal i Italisë.
Nga veprimet hetimore të kryera në Itali, dyshohet se shtetasit T. K., alias A. I. dhe P. B., alias P. T., së bashku me 7 shtetas të tjerë të arrestuar tashmë nga policia e Italisë, janë pjesëtarë të një organizate kriminale për trafikimin e kokainës, organizatë me veprimtari në Itali.
Gjatë zhvillimit të këtij operacioni, Policia e Italisë ka sekuestruar në cilësinë e provës materiale, rreth 7 kg lëndë narkotike kokainë.
Interpol Tirana dhe Interpol Roma vijojnë bashkëpunimin, me qëllim ekstradimin e këtyre shtetasve drejt Italisë.
Policia shqiptare dhe ajo italiane kanë intensifikuar bashkëpunimin mes tyre, për të hetuar në mënyrë të përbashkët, grupet kriminale të trafiqeve, që veprojnë në të dyja vendet.
Së fundi Tiranën e ka vizituar drejtori i drejtorisë Hetimore Antimafia të policisë italiane, Maurizio Vallone. Ai u prit nga
Drejtori i Përgjithshëm i Policisë së Shtetit, Muhamet Rrumbullaku. Gjatë bisedimeve u vlerësua se partneriteti italo-shqiptar ka gjeneruar rezultate tejet pozitive në luftën kundër krimit të organizuar.
