Policia metropolitane në Londër është kritikuar për menaxhimin e dobët të vigjiljes për të përkujtuar Sarah Everard, shefe marketingu që u vra teksa po kthehej në shtëpi. Një polic është arrestuar nën dyshimet për kidnapimin dhe vrasjen e saj.
Të shtunën mbrëma situata është përkeqësuar në jug të Londrës, kur policia nisi të arrestonte pjesëmarrësit ndërkaq gratë i largoi nga tubimi përkujtimor. Policia ka konfirmuar arrestimin e katër personave dhe është arsyetuar se këtë e ka bërë për sigurinë e njerëzve.
Qindra persona janë mbledhur të shtunën mbrëma për të përkujtuar 33-vjeçaren, vrasja e të cilës ka ngjallur debat publik në lidhje me sigurinë e grave nëpër rrugët e Britanisë së Madhe.
Ministria e Punëve të Brendshme ka kërkuar sqarime nga policia metropolitane në lidhje me veprimet e zyrtarëve gjatë tubimit të së shtunës. Kryetari i Londrës, Sadiq Khan, ka thënë se skenat e dhunshme ishin të papranueshme, ndërkaq ka kërkuar një sqarim nga shefat e policisë metropolitane.
