Politikani i ekstremit të djathë, Dragan Markoviq – Palma, ka ftuar serbët të mos shkojnë për pushime në Shqipëri, pasi sipas tij, edhe ajo është përgjegjëse për atë që “po u ndodh serbëve në Kosovë”.
Kryetari i partisë “Serbia e bashkuar”, që tash e sa kohë është në koalicion me partinë e presidentit Aleksandar Vuçiq (SNS), ka thënë se nuk ia vlen të shkohet në Shqipëri për kursim të pak parave.
“Golgotën që e kemi përjetuar si popull në Luftën e Parë e të Dytë Botërore, pastaj ngjarjet e fundit në Kosovë, kur krime të jashtëzakonshme janë kryer ndaj serbeve, e të cilët janë përzënë falë shtetit të Shqipërisë, nuk guxojmë ta shesim për diçka që quhet ‘Coca-colë’ më e lirë për 5 për qind në krahasim me destinacionet tjera”, ka thënë Markoviq, përcjell b92.
Kohëve të fundit, gjithnjë e më shumë serbë po ia mësyjnë bregdetit shqiptar për pushime.
Shoqata e Hotelierisë dhe Turizmit në Shqipëri, në hapje të sezonit ka thënë se pret që sivjet 100.000 serbë të vizitojnë brigjet e Adriatikut e Jonit në Shqipëri.
Ndryshe nga Markoviq, dy qeveritë, ajo e Shqipërisë dhe Serbisë, gjithnjë e më shpesh po takohen për të rritur bashkëpunimin në fushën e turizmit. Së fundi, ministri i Turizmit Blendi Klosi, për këtë qëllim ishte në Beograd.