Autoriteti polak i konkurrencës ka gjobitur gjigantin rus të gazit Gazprom me 6.5 miliardë euro, që ka vazhduar projektin e ndërtimit të tubacioneve Rrjedha e Veriut 2 për në Gjermani, pa siguruar aprovimin, raporton agjencia AP. Autoriteti ka thënë se ky projekt i dëmton konsumatorët polakë dhe rritë varësinë e Evropës nga importi rus.
Gazprom ka thënë se do ta apelojë vendimin..
Zyra Polake e Konkurrencës dhe Mbrojtjes së Konsumatorëve ka njoftuar sot se po ashtu janë gjobitur edhe pesë kompani tjera ndërkombëtare që kanë marrë pjesë në projektin me një shifër totale 52 milionë euro. Ka thënë se nuk është siguruar leja për të ndërtuar bashkërisht dhe financuar tubacionin, duke thënë se kjo ka shkelur ligjin e antitrustit.
Vendimi obligon gjashtë kompanitë të anulojnë kontratat për financimin e projektit.
Polonia është kategorikisht kundër tubacionit, duke e parë si projekt të motivuar politikisht. Tubacioni është në fazën finale të ndërtimit dhe ka synim transportimin e gazit natyror rus nëpër shtratin e detit Baltik e për në Gjermani dhe Evropën Perëndimore, duke shmangur rrugën tradicionale tranzit nëpër Ukrainë e Poloni. Gjermania e përkrah këtë, duke thënë se është thjeshtë projekt biznesor, por së fundi ka thënë se do ta rishqyrtojë qëndrimin.
Kompanitë tjera të gjobitura janë Engie Energy e Francës, OMV e Austrisë, Shell dhe Uniper & Wintershall e Gjermanisë.
