Në një deklaratë nga llogaria e tij në Twitter, Pompeo tha: “Ne jemi të lumtur të njoftojmë se jemi në fluturimin e parë të drejtpërdrejt zyrtar nga Izraeli drejt Sudanit”
Fluturimi i parë drejtpërdrejt zyrtar mes Izraelit dhe Sudanit, vende që nuk kanë marrëdhënie diplomatike, u bë nga avioni që transportoi Sekretarin e Shtetit të SHBA-ve, Mike Pompeo, transmeton Anadolu Agency (AA).
Pas përfundimit të kontakteve në Izrael, si pjesë e turneut të tij që ka filluar në Lindjen e Mesme për normalizimin e marrëdhënieve të Izraelit me vendet tjera arabe, Pompeo u nis drejt Sudanit nga aeroporti Ben Gurion në afërsi të Tel Avivit.
Në një deklaratë nga llogaria e tij në Twitter, Pompeo tha: “Ne jemi të lumtur të njoftojmë se jemi në fluturimin e parë të drejtpërdrejt zyrtar nga Izraeli drejt Sudanit”.
Gjatë vizitës së tij në Sudan, Pompeo pritet të takohet me kryeministrin sudanez, Abdalla Hamdok dhe kryetarin e Këshillit Sovran të Sudanit, Abdel Fattah al-Burhan.
Theksohet se në vizitën e Pompeos, në rend dite do të vijë çështja e normalizimit të marrëdhënieve mes Sudanit dhe Izraelit.
Pas Emirateve të Bashkuara Arabe (EBA) edhe Sudani, Bahreini dhe Omani kanë thënë se mund të arrijnë marrëveshje për normalizmin e marrëdhënieve me Izraelin.
