Kryeministri Rama ka lënë një shije të keqe sot, ndërsa ka tentuar të bëjë humor e propagandë bashkë, me një nga ngjarjet më tragjike pas rënies së komunizmit.
Duke iu referuar historisë së dhimbshme të 20 mijë shqiptarëve, të cilët 32 vite më parë, zbarkuan me anijen Vlora në Bari të Italisë për t’i shpëtuar mjerimit në vendin e tyre, Edi Rama ka tentuar një krahasim vulgar me italianët që sot vijnë në Shqipëri për të kaluar pushimet.
Ky postim provokues, që kryeministri artist e ka huazuar nga një faqe memesh në rrjetet sociale, është sa banal po aq edhe i pacipë.
I fiksuar të kapet pas cdo lajmi që i shërben si mjet për propagandë në këto kohë të vështira për qeverinë e tij, kryeministri, pa e vrarë aspak mendjen, ka tentuar të promovojë me demek me humor Shqipërinë e tij turistike, mbi ngjarje dramatike për mijëra familje shqiptare.
Mbi 20 mijë emigrant udhëtuan në kushte mizerabël, për dy ditë, në kërkim të një jete më të mirë dhe mbërritën në Bari në 8 gusht 1991, ku u trajtimi i tyre u regjistrua si një turp për autoritetet italiane. Ata u mbyllën për disa në ditë në stadiumin e Barit, burra, gra, fëmijë dhe të moshuar, në kushte aspak njerëzore, për t’u rikthyer më pas mbrapsht në Shqipëri nga autoritetet italiane.
Intelektualë dhe politikanë italianë, gazetarë dhe autoritete fetare kritikuan ashpër qeverinë e tyre për këtë trajtim që u bënë mijëra njerëzve të pashpresë.
Ky përvjetor do të ishte rasti jo për të bërë propagandë, por për të reflektuar mbi një tragjedi njerëzore, që vazhdon ende sot pas 32 vitesh.
Vetëm në 10 vitet e fundit gati një million shqiptarë kanë lënë vendin dhe të shumtë janë ata që duan të largohen. Tragjedia në përmasa të tjera përsëritet ende në ujrat e La Manshit.
Mirëpo kryeministri, që thellësinë e mendimit dhe të reflektimit e ka një shfaqje të huaj, edhe këtë përvjetor e ka shfrytëzuar për propagandën e tij të shpifur të “boomit” turistik që po përjeton Shqipëria.
Të krahasosh ikjen e dhimbshme të bashkëqytetarëve të tu, me pushimet e italianëve në bregdetin shqiptar, nuk është kontrast i zhvillimit, por banaliteti i së keqes që tenton t’i vërë një llustër problemeve të rënda që ka vendi.
Vetëm lehtësia e papërballueshme e një individi si kryeministri ynë, mund të kthejë në cirk propagandistik, një hemoragji kombëtare, që nisi para 32 vitesh e nuk ka ndërmend të ndalet edhe sot. Pyetja që do të duhej t’i bënte vetes Edi Rama në këtë përvjetor, është: Mirë italianët vijnë në Shqipëri, po shqiptarët pse vazhdojnë të ikin nga vendi i tyre?
Nëse do e bënte këtë pyetje, me siguri do të kishte ndjerë turp, të shpërndante memen vulgare si medalje për rilindjen e tij turistike.
Për të sjellë në vëmendje përmasat dramtatike të 20 mijë shqiptarëve të anijes Vlora, në vijim kemi zgjedhur një fragment nga filmi dokumentar, “Anija”, i regjisorit Roland Sejko, film i cili u vlerësua me çmimin më të lartë të kinemasë italiane, “David di Donatelo”.
