Arsenali dhe Brightoni kanë hapur fushat stërvitore të hënën për stërvitje individuale të lojtarëve.
Premier League po shpreson që të rinisë stinori më 8 qershor dhe të përfundojë në korrik, në mënyrë që të përshtatet me planet e UEFA-s për vazhdimin e Ligës së Kampionëve dhe Ligës së Evropës, shkruan BBC.
Që stinori të rifillojë më 8 qershor, do të duhet që klubet të kthehen në stërvitje të plotë më 18 maj.
Klubet e Premier Leagues do të bisedojnë të premten për opsionin e rifillimit.
Premier League është pezulluar që nga 13 marsi, për shkak të pandemisë së koronavirusit dhe gjitha klubet mbesin të vendosura që të luhen edhe 92 ndeshjet e mbetura të stinorit.
Gjitha ndeshjet do të luhen pa shikues dhe liga po shqyrton opsionin që ndeshjet të transmetohen edhe në televizion pa pagesë.
Një çështje që do të debatohet të premten do të jenë stadiumet që do të lejohen të përdoren dhe nëse do të jetë numri i kufizuar i stadiumeve apo do të luhen ndeshjet në fusha neutrale.
Mirëpo, rikthimi i ndeshjeve ende varet nga qeveria dhe plotësimi i kritereve, veçanërisht rritja e numrit të testimeve dhe aplikimi i distancës sociale.
Po ashtu zyrtarët e lartë mjekësorë do të përgatisin protokollet shëndetësore që të lejohet vazhdimi i garave me dyer të mbyllura.
BBC ka raportuar të shtunën se qeveria po planifikon një numër të takimeve për të ndihmuar rikthimin e sporteve elitare.
Po planifikohet që sporti të rikthehet brenda disa javëve, nëse bëhet përparim në luftën kundër koronavirusit.
Më tepër se 20 mijë persona kanë vdekur në Britani nga koronavirusi.
Të dielën, politikani Dominic Raab ka thënë se do të jetë e vështirë që të rikthehen sportet amatore këtë verë, për shkak të shkallës së interaktivitetit, por se sportet profesionale mund të kthehen për shkak të shkallës së testimit që mund të prezantohet.
Klubet e Bundesligës në Gjermani janë kthyer në stërvitje dhe stinori mund të rifillojë më 9 maj, nëse merr leje nga qeveria.
Në Itali, klubet e Serie A mund të rikthehen në stërvitje individuale më 4 maj dhe ekipore më 18 maj, ka njoftuar kryeministri italian.
Unioni Botëror i Futbollistëve (FIFPRO) ka thënë se rikthimi i futbollit rrezikon që të dërgojë sinjal të keq.
“Ka shumë pyetje logjistike e mjekësore për testimet dhe protokollet, por edhe pyetje sociale. Ne na duhen udhëzime dhe protokolle se si të kthehemi në mënyrë të shëndetshme dhe të sigurt. Futbolli është sport i kontaktit dhe ndjejmë se duhen standarde shumë të larta të mbrojtjes. A jemi duke dërguar mesazh të duhur te shoqëria dhe a po inkurajojmë një kthim të shëndetshëm në jetën normale? Apo po dërgojmë sinjal të keq se futbolli ka rregulla tjera nga pjesa tjetër e botës?” ka thënë sekretari i përgjithshëm i FIFPRO, Jonas Baer-Hoffmann.
